【丁蟹效應】恆生指數今日忽然狂瀉 原來同《大時代》有關?

撰文:洪曉璇
出版:更新:

今日香港恆生指數忽然大瀉1649點,唔少股民叫苦連天,大家都好想知道到底咩事,係新年前回一回,定係熊市先兆呢?有網友就話,一切源於鄭少秋﹗又關佢事?最近秋官無特別攪作喎﹗有網友貼左一張圖出嚟之後,一切明白了……

1992年《大時代》播出,成為香港觀眾集體回憶被捧為神劇。(影片截圖)

1992年神劇《大時代》播出,呢套戲以股票市場為主題,咁啱就由呢一年開始,每逢有鄭少秋主演嘅劇集、舞台劇,甚至演唱會上映時,同一時期香港股市好多時會出現下滑,由於鄭少秋喺《大時代》飾演嘅角色叫丁蟹,故稱之為「丁蟹效應」。咁同今次跌市又有咩關係呢?

有網友搵出當年劇中丁家父子跳樓日子,正正係2月6日。(影片截圖)

劇中丁家幾父子喺大跌市後齊齊走上天台,準備孖住跳樓自殺,無錯就係呢一幕,寫上2月6號下午5點,即係收市之後佢地輸清光走上天台,日子即係今日﹗﹗對於呢個巧合網友都覺得嘖嘖稱奇,真係咁啱定咁邪呢,不過隨即有網友貼圖唱反調,圖中key上日子居然係6月7號﹗﹗﹗原來每次股市大跌,都會有人改一改日子Po呢張圖一次,只能秋官講句:「真係好無辜囉﹗」

同一場景日子變咗6月7號,原來又係改圖。(網上圖片)
次次有作品面世,都要俾人問丁蟹效應,呢句字幕應該係鄭少秋心聲……(影片截圖)
你可能感興趣