【二十四小時】余文樂重拾唱歌熱情？　搶咪高歌《無間道》

曾經話過自己有「錄音室恐懼症」的余文樂，去年為電影《春嬌救志明》重開金口，情況同化石一樣咁罕見，不過，余文樂之後接連現身五月天大連以及香港演唱會，並同楊千嬅齊齊合唱《春嬌與志明》，而年初楊千嬅演唱會尾場時，余文樂又再開金口，情深獻唱《ＭR.》冧老婆，似乎對唱歌重執信心同熱情。

或者真係唱開有鋪癮，余文樂喺最新一集內地綜藝節目《二十四小時》中，同林志穎、胡一天、林允等人玩估歌仔時，聽到熟悉的前奏時，已忍不住飛撲搶咪，「明明我已晝夜無間踏盡面前路……」為了重現《無間道》呢個經典，樂少更唱到瞓地，之後再自帶對白「你係臥底，我唔係！」享受程度如同在紅館開騷一樣，而胡一天、林允等人亦交足戲，在旁瘋狂尖叫。