【有片】《三個女人一個因》放周末炮灰檔 居然有楊千嬅唱主題曲

撰文:
最後更新日期:

自從TVB開拓周末播劇時段,網友笑言係炮灰檔,一晚播兩集清倉底劇一流,暫時播左4套劇集,都係拍攝完一段時間,甚至曾經喺其他平台播出,大眾期望較低都實屬理所當然。估唔到嚟緊嘅《三個女人一個因》為大家帶來驚喜,預告片中加入一小段主題曲,係楊千嬅唱架﹗

《三個女人一個因》本來安排於去年中播出,點知忽然被抽起。(資料圖片)

周日兩小時播劇檔期,由去年9月尾嘅《雜警奇兵》,到《性在有情》,嚟到《三個女人一個因》,三套戲都拍咗好一段時間先播出,《性在有情》仲要喺MyTV SUPER上過架,被視為炮灰檔期實在無可厚非。呢日預告片一出街居然為大家帶來驚喜,唔係黃智雯配袁偉豪,亦唔係劇情有幾驚天動地,而係主題曲《無雙》居然搵到楊千嬅主唱﹗

楊千嬅對上一次唱TVB劇集主題曲,原來已經係11年前。(網上圖片)

女主角黃智雯亦喺IG上載預告片並留言話:「千嬅,謝謝您﹗唱出了方以因之痛,歌聲鈎起了很多畫面,超感動﹗亦代監製德哥感謝您,百忙中仍抽時間錄歌,用心演繹了這首「無雙」,完美配合了劇情畫面,為劇集生色不少。」《三個女人一個因》本身喺去年6月左右播出,據知呢首歌當時亦已經錄製完成,不過就因為臨時抽起讓路俾《蘭花劫》而放入倉底。

女主角黃智雯上載預告片感謝千嬅抽空唱主題曲,不過奇就奇在字幕點解係英文嘅?(黃智雯IG)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。