波多野結衣殺入花市被趙永洪攬　粉絲怒叫：有冇搞錯呀！

波多野結衣是不少男士心中的女神，她陪伴大家度過各個高低起跌的時刻。日日對住個mon到底幾時先可以見到真人呀？

機會嚟喇飛雲！波多野結衣今日降臨維園，出席電影《棟篤特工》宣傳活動，同場有演員趙永洪。女神出巡引來過百途人圍觀，頓時令該區域擠得水泄不通。有男fans以日文向女神打招呼，亦有男fans為一睹芳容騎膊馬，咩法寶都出齊。旁邊的攤位亦唔執輸拉生意，開價廿蚊一張幫後排fans影波多野結衣正面。為見女神大家可以去到幾盡？接受訪問時，趙永洪大讚波多野結衣專業，笑言自己沒有追看對方的作品；另外被問到會否覺得對手戲唔夠喉，他則表示戲份都由導演安排。趙永洪祝大家身體健康、心想事成，又笑言：「出入平安都好緊要！」更與波多野結衣攬攬，引後排男fans十分「葡萄」並大叫：「有冇搞錯呀！」

波多野結衣亦好識做用廣東話祝福大家：「恭喜發財，利是逗來，新年快樂！」被問到第一次行花市感覺如何，她表示：「冇諗過咁多人嚟，好突然！」那情人節會如何度過？她表示仍然單身：「依家未有情人，都係工作中度過情人節，不過有fans陪住唔會寂寞！都想買桃花令戀愛運好啲！」波多野結衣亦提到，家人都希望她早日成家立室，自己喜歡溫柔和充滿笑容的男生。