李亞男煲湯落味精 擺脫地獄廚神之名出食譜:人真係需要鼓勵

撰文:鄺鈺瑩
出版:更新:

王祖藍同李亞男(Leanne)拍拖11年,雖然外界一直覺得二人並不合襯,但他們用行動去証明了一切。王祖藍近年主力發展內地市場,但為怕獨留老婆在港,近年再次將工作重心轉移香港。而國際華裔小姐出身的Leanne,雖然美貌智慧並重,可惜原來係地獄廚神一名,為了令老公「三餐溫飽」,近年積極學做煮婦,最終連cook book都出埋!呢啲咪就係愛囉。

令李亞男由地獄廚神變為家庭煮婦甚至出cook book,幕後功臣一定係王祖藍。(黃國立攝)

「以前我整糖水無水,煲湯會落味精,名副其實係地獄廚神。」李亞男曾經試過在雜菜湯中加入味精,被老公發現打遭到嫌棄,大受打擊的她因而落淚。「因為我真係自己去買材料,係好用心去整嘛。」經此一役後,李亞男開始專心鑽研烹飪,在奶奶、媽媽甚至係阮兆祥女友指導下,她終於開竅了。「祖藍依家會apprecaite,人真係需要鼓勵,自己都愈煮愈開心。」

忙還忙,但祖藍每到新年都會停工,先同老婆以及家人去旅行兼慶祝結婚周年,之後就再同老婆享受二人世界。

像這天在星級中菜館雲來軒訪問時,李亞男不忘向總廚兼老闆黃亞保請教整年糕的方法,最後更直接落手落腳攪拌材料。「之前有整過蛋糕,但年糕就未試過,新年想整畀屋企人食嘛。」既然對烹飪如此感興趣,問李亞男有否考慮到外國深造,她略帶可惜的表示:「係有想去法國學藍帶,但至少要9個月至1年時間,我暫時唔可以離開我family太耐,可能會在香港報讀coooking class先。」
 

李亞男的cook book取名《暖男廚房》,以為是指在韓劇中出現的那些暖男,她卻十分害羞地表示:「因為我叫亞男,煮飯的亞男係好溫暖。」問到她家中的那位是否暖男一名,沒想到她的反應笑翻了全場。「吓?佢呀……他在屋企常常都處於很放鬆的狀態,成日瞓同埋較為關注新聞,嚴格來說他是個鍾意睇報紙的叔叔。」看到在場所有人笑到收唔到聲,李亞男嘗試用其有限的中文去解釋,例如指老公好照顧家人,每次父母來港時,就算幾忙都會做司機帶他們到處食好嘢……結果原來王祖藍成了鍾意睇報紙的司機叔叔!「佢未必係好gentleman,但一定會確保我生活無任何憂慮。」
 

祖藍近來常常話自己不復當年瘦,呢啲其實咪又係幸福肥。

結婚三年,王祖藍今年生日時,被一班《奔跑吧兄弟》成員催B,他之後亦表示準備好做爸爸,咁老婆準備好未呢?沒想到李亞男的答案一樣是笑翻全場。「我成日都祝福佢身體健康,同埋三年抱兩。」講到成件事好似同自己無關咁?李亞男慢慢解釋說,心態上已在準備中。「以前覺得太早,依家就覺得係時候要plan,唔想做高齡產婦,更加唔想陪佢跑兩步就走不動。」


髮型:Ted Yeung @ i i Alchemy hair & nail 
化妝: K.T. Tsui 
服裝 :  kate spade new york 
鞋 : ETRO
首飾 : Atelier Swarovski
場地:雲來軒