【成家立室】郭富城做老竇心態變：工作完即刻想返屋企見個女

郭富城於1994年的一席戲話，說自己將來結婚會向全港巿民派利是，估唔到大家一等就係24年，佢今日出席新春活動，話今年係佢人生中最開心的新年：「去年成咗家，又添咗新成員，從來未感受過呢種家庭熱鬧氣氛，一個好圓滿的家庭，工作完想即刻想返屋企見個女。」

去年成家立室又生埋女，城城話今年新年好圓滿，係佢過過最開心嘅新年。（黃國立攝）

但城媽似乎未滿足，催城城快啲添返個仔，佢仲扮城媽催自己生仔個樣，一向出名孝順嘅城城梗係聽媽咪話啦：「我都係錫媽咪嘅，想佢開心，我都係順其自然咁去追多個仔。」

城媽想佢快啲再添丁，城城話自己最聽媽媽話，努力追仔。（黃國立攝）

婚前經常拒絕回應感情問題嘅城城，結婚生女之後，就成日將囡囡Chant掛喺口唇邊，講起個女，停都停唔到，仲話好享受湊女嘅生活:「我覺得最大嘅挑戰係餵佢食糊仔。」因為B女一啖一啖咁食，好考耐性，不過城城咁錫個女，阿女食幾耐都無問題啦。

榮升爸爸嘅城城大談湊女樂，仲話湊女最大挑戰係餵佢食糊仔。（黃國立攝）

城城續說：「之後第二個目標就是帶佢出公園玩，因為過去幾個月都忙於工作，無時間帶佢去玩，而且佢之前年紀太小也不敢帶佢出去太多人嘅地方，依家就帶佢去瀡滑梯，盪韆鞦也很開心，而再下一個目標就是幫她沖涼。」若說全世界最得城城心嘅女仔，一定非佢個囡Chant莫屬。