被指包晒拍拖使費 李佳芯:喺我字典唔存在要個男仔畀晒錢

撰文:
最後更新日期:

女神李佳芯 (Ali) 不止樣靚身材正,性格仲好好,絕非一般港女可以媲美,早已被網民封為完美女朋友。Ali最近就被雜誌影到她與ViuTv主持男友陳炳銓出街拍拖二人世界,仲指兩人食飯shopping睇戲所有使費,都是由Ali一手包辦。一眾男士睇到呢個報道只能輕嘆這些機會……今晚Ali出席她擔正做女一的無綫新劇《BB來了》收工飯,當然要問下她到底是否全包拍拖的使費啦。Ali被問到有關報道表示:「唉,八卦新聞嘅嘢唔可以盡信,其實之前都有過相同嘅報道,我亦都講過唔再講㗎喇,可能係我個廣告太深入民心,事實唔係所有嘢都係Ali pay㗎。」

Ali在劇中做媽媽,唔知幾時都現實中呢?(張嘉敏攝)

咁作為一個女朋友的Ali同男朋友拍拖時,又介唔介意自己要畀錢呢?對此Ali說:「喺我自己嘅字典入面,係唔存在要對方畀晒錢呢樣嘢,無論拍拖又好,同朋友相處都好,一段開心嘅關係最重要,唔會係某一方畀晒,唔使話去到AA制計得咁清楚,一人一次就最開心,如果係夫婦就更新唔使計啦,拍緊拖都可以耐唔耐畀下㗎嘛。」

佢話會同男朋友分擔拍拖使費。(張嘉敏攝)

不過Ali都好坦白咁話作為女仔都會想男朋友花錢喺自己身上:「都想男朋友送下禮物,同我食下燭光晚餐,男仔肯使錢證喺女仔身上證明佢錫你,係女仔都鍾意畀人氹都會開心。」對於報道指她和男友處於女尊男卑的情況,Ali說:「大家做呢行,佢都算係半個幕後人,難免會畀人拎嚟比較。最緊要大家思想一致,就會明白,我哋又真係唔存在呢種顧慮,唔存在高低之分。對我嚟講一段關係完全不在於學歷、收入或者家底之類,而係兩個人思想步伐一致。我揀男朋友亦唔使睇對方係咪有樓有車有身家。」有Ali呢位咁好的女朋友,她男朋友實在太幸福喇。

Ali重申佢同男朋友關係唔存在女尊男卑。(張嘉敏攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。