王嘉爾鹿晗中分頭復興 郭富城28年前已經玩到出神入化
撰文：冼燕珊
出版：更新：
「潮流係一個循環」，呢句嘢無錯㗎！前排大家先驚人發現蔡少芬24年前嘅空氣瀏海，近年由韓國復興，仲帶起個潮流吹返嚟香港，其實唔只空氣瀏海，當年爆紅嘅「郭富城中分頭」，今時今日，又興返。
郭富城當年呢個中分頭，個個都爭相仿傚。（網絡圖片）
有網友於討論區開帖，指依家啲韓星中分頭，係抄郭富城剛出道嘅髮型，當年呢個髮型真係深入民心，仲有個專稱─「郭富城頭」，真係非常有代表性，幾乎個個男仔都剪呢個中分頭，其他藝人都紛紛仿傚，包括劉德華、林志穎、古天樂等，連台灣嘅民眾都深受影響，羅志祥（小豬）當年就係以「郭富城頭」參加四大天王模仿大賽出道，睇返網上啲相，周杰倫細個都剪過呢個頭，不過就好似唔係好襯當年嘅佢。
羅志祥當年模仿郭富城入行。（微博圖片）
周杰倫細個都剪過中分頭，不過就唔係好襯佢。(網絡圖片)
估唔到呢個頭依家又喺內地同韓國興返，除咗呢期曝光率極高的王嘉爾同鹿晗，其他韓星包括李鐘碩、李敏鎬、朴敘俊，仲有剛入伍的G-Dragon都有剪過中分頭，還原返廿幾年前嘅經典「郭富城頭」，掀起一陣中分熱潮，呢陣風又漸漸咁吹返嚟香港，呢排都多咗香港嘅男仔剪呢個頭，不過大家唔好忘記，呢個頭係郭富城帶起先㗎！
新一代小鮮肉代表王嘉爾, 都剪中分頭。(視覺中國)
鹿晗還原城城當年個頭。（微博圖片）
蔡少芬放返20歲時啲相上網 網民驚呼：佢個空氣瀏海靚過晒啲韓星