《周遊東京》周奕瑋親身體驗日式Speed dating 成功拎到女仔電話
撰文：冼燕珊
出版：更新：
嚟到第五集《周遊東京》，周奕瑋(Jarvis)就帶大家去識女仔，原來Jarvis係一名怕醜仔，去識女仔之前非常緊張，仲大叫：「我唔good at 識女仔!」唔知大家聽到呢句會唔會有共鳴呢？
Jarvis話自己「唔good at 識女仔」，非常怕醜。(影片截圖)
Jarvis今集介紹嘅呢間居酒屋，係日本一間連所式居酒屋，叫做相席屋，其實相席日文嘅意思即是「搭枱」嘅文化，呢間相席屋啱晒單身男女，因為佢會安排異性客人坐埋一齊，女仔免費入場，而男士入場，首30分鐘任飲任食，都只係JPY1500-JPY1800（約HKD105-HKD126），每延長10分鐘，就收JPY500-JPY600(約HKD35-HKD42)。客人坐低之前，會先填寫一些擇偶條件，店員會根據呢啲條件去安排配對，可以算係其中一種Speed dating，如果傾傾吓覺得唔ok，可以行去後場廁所位，嗰度放咗啲卡，提出換位要求，店員就會作出相應嘅安排。
相席即是「搭檯」的意思。(影片截圖)
阿Jar接受《香港01》訪問時，笑言上述情況類似「彈鐘」。佢回想當日入到居酒屋，全場坐滿七八成女仔，當時因為時間尚早，未有咁多男仔客，難忘佢同攝影師入到居酒屋嗰下嘅震撼：「我係第一次覺得自己好似獵物一樣，全場嘅女仔由我哋入到去開始一路望到我哋行到去拍攝嘅位，嗰種注視嘅力量原來係咁大。」
Jarvis話當日入到居酒屋，被全場女仔注視，非常難忘。（影片截圖）
Jarvis話佢本身真係好怕醜，不過從節目上都見佢好努力嘗試同兩位日本女仔互動，仲成功拎到Contact添！所以各位單身男女都可以試吓去幫襯，可能真係有機會「出Pool」成功！
【周遊東京】周奕瑋推介CP值超高放題 山泥傾潟式海贍壽司勁正