【有片】棒棒堂相隔多年Re-U想當年　獨欠一人有遺憾

十幾年前台灣出現一波選秀熱潮，大批素人爭相參加希望有機會踏入娛樂圈，其中《模范棒棒堂》當年喺大批少男中，選出王子、敖犬、小煜、阿緯、小杰、威廉組成男子組合「Lollipop棒棒堂」，迅速紅遍亞洲。不過2010年佢地就因為合約到期拆夥發展。事隔多年呢日曬出一張棒棒堂合體照，令網友高呼：「童年回憶返晒嚟﹗」

王子呢日上載6人合體照片留言話：「大家一起坐下來，細數十二年的點滴，聊起那些年少往事，很多美好回憶又再度想起。希望未來大家ㄧ切都好，合體演唱會就交給天意。」不過細心一睇，當中係獨缺成員敖犬，取而代之嘅就係佢地嘅伯樂，前經理人張世明（Andy），而阿緯仲抱埋囡囡參與聚會添。原來佢地係因為Andy哥之前生病住院，威廉主動相約各人聚會，地點正正就係阿緯嘅餐廳。而敖犬因為人在日本拍攝所以未能出席。

節目《模范棒棒堂》由范瑋琪主持，承襲同台節目《我愛黑澀會》之性質，招募大批年輕少男參加節目演出，並以「明星養成」作為目標。經過千人試鏡及三次淘汰賽後，節目單位在2006年12月2日，於第一、二代所有成員中，選出六位成員組成新團體「Lollipop棒棒堂」出道。07年12月推出首張專輯，不足一個月後就喺台北小巨蛋舉行演唱會創下紀錄。09年7月於白香港紅館舉行兩場演唱會，至2010年5月「羅志祥2010舞法舞天3D巡迴演唱會(香港站尾場)」作最後一次合體演出後，正式宣告6位成員分家。