【兄弟‧多圖】江嘉敏怒摑王浩信　打到佢面紅：摑到連我都有內疚

《兄弟》一劇昨晚終於完成最後一個鏡頭拍攝，一眾演員於更齊聚一堂食「收工飯」。不過江嘉敏就比原定時間遲了幾分鐘，原來她是拍完《兄弟》最後一個鏡頭再趕過來。江嘉敏：「哈哈，第一個鏡頭係我，最後一個鏡頭又係我。」

江嘉敏接受《香港01》訪問時，談及一些拍劇時趣事。「我拍呢套戲，我做得最多嘅唔係打，而係反．白．眼。因為啲人成日話：嘩，妳咁細粒點解做人保鑣嘅？然後我就會（反白眼）。所以我宜家反白眼好叻㗎喇，哈哈。」原來江嘉敏在劇中飾演保安（Sitting），後來受到王浩信飾演的張非凡賞識而「晉升」為保鑣。江嘉敏更稱拍劇時，王浩信經常與她開玩笑。「佢（王浩信）成日都咁笑我：吓，妳咁粒，擋到下半身又擋唔到上半身子彈喎。」

【兄弟】成班男人結伴菲國開工好鬼MAN 陳志健：成個氣氛都好好

【兄弟】杜燕歌又係客串出場 配音王澳洲開過酒樓老婆係韓馬利

其實江嘉敏在劇中與王浩信也有不少戲份，其中更有段「似是而非」的感情線。身型細細粒的江嘉敏，劇中更要在擂台上被王浩信「堅打」廿幾拳。不過江嘉敏也說在之後劇集拍攝亦「報了仇」。「有一幕講佢（王浩信）喺病床暈咗好耐，咁我就要摑醒佢。我係摑咗佢好多下。本來頭3，4個take我有留力，但係佢話好唔似。後尾我見到王浩信塊面有啲紅，我反而內疚。同埋因為佢要扮暈，我摑嘅時候其實感覺到佢有少少郁一郁。拍完之後佢塊面係紅晒，因為我真係冇留力。」真係聽者傷心，聞者流淚。不過，原來網民幫王浩信改「兜巴信」呢個名真係冇錯。