甄子丹《葉問4》打到去美國 唔排除同雲狄素史泰龍單打獨鬥？
撰文：陳栢宇
出版：更新：
丹爺愛駒「宇宙車神」超齡，無緣出戰打吡賽事。（陳順禎攝）
「宇宙最強」甄子丹最近一如以往忙到爆炸，雖然他現時正在內地趕拍新戲《肥龍過江》，但今日中午都抽時間到跑馬地馬場，出席《2018寶馬香港打吡大賽獲選參賽馬匹名單公佈會》。連續六年擔任「寶馬香港打吡大使」的丹爺在會上就指自己好期待此盛事：「上年我喺場邊叫到聲都沙，今年再嗌得大聲啲！」期間老婆汪詩詩亦在螢幕上驚喜亮相，更問老公如果贏得打吡會有咩心情同表情，丹爺即Cute爆拎起獎盃扎實個馬隔空整個勁Happy表情畀老婆睇，又笑謂：「如果我贏咗一定Keep住個獎盃，因為之前一直贏過嘅嘢都畀哂老婆，佢係我CEO。」
提到愛駒「宇宙車神」現在五歲，無緣出戰限四歲馬的打吡賽，問有否諗過買多隻馬準備下年問鼎殊榮，丹爺直認：「有諗過㗎！但有時間先，都係我同蔡加讚夾，交畀佢決定。（改名宇宙乜乜？）買咗先諗啦，叫宇宙乜乜都係因為順口啫。」
如果贏到打吡盃，丹爺話自己會「自私Keep」，因為一直都咩都畀哂老婆汪詩詩。（陳順禎攝）
拍完《肥龍過江》之後，丹爺便隨即埋首為《葉問》系列第四輯開工，更到美國取景與「李小龍」會面，問打遍天下無敵手是否已經揀定對手，是否有機會搵老友雲迪素同史泰龍演出？曾與前拳王泰臣隻揪的他就指未定：「雖然我都係監製，但我同時都監製幾套戲，所以創作上我交哂畀導演葉偉信，要睇劇情係點，先再諗咩Casting。」
講到他次次最後都贏，會不會贏到悶，感覺到無敵是最寂寞？他即答得好妙：「呢幾年我都唔諗打方面喇，因為都建立咗個Branding，團隊都好有水準，總之就一定打得好睇，反而我依家係着眼於個題材同角色上。」
丹爺曾經場內睇馬High到嗌沙聲。（陳順禎攝）
好多觀眾都想睇丹爺同雲迪素、史泰龍呢啲大隻佬隻揪隻。（陳順禎攝）