林允回歸《美人魚2》入組開工? 周星馳助手留言:珊珊你好

撰文:鄺鈺瑩
出版:更新:
《美人魚》單係中國的票房已經33億人仔,續集開拍都係意料中事。(網上圖片)

由周星馳一手包辦製片、監製、編劇、導演嘅《美人魚》,於前年上影時,在中國大收33億人仔,全球票房更高達5.53億美元,成為史上最賣座的非荷里活電影。金礦一樣的票房,開拍續集都理所當然,而原來《美人魚2》日前已於深圳開拍。

一個話進組,一個話「珊珊你好」,全世界都估林允係為《美人魚》開工。(網上圖片)

去年星爺為選角而搞咗個名為《星星美人魚》嘅綜藝節目,當時林允,甚至於係張柏芝亦都有現身節目傳授星女郎心得,節目上月播出最後一集,女團SNH48成員孫珍妮最終成為新一代星女郎。正當大家都以為孫珍妮會係《美人魚2》第一女主角之際,微博就有消息指林允將會繼續係第一女主角,原因係林允前日發文表示「進組如搬家,最先收拾一定要化妝台,備齊裝備,還買了新的自拍杆,期待充實的劇組生活。」之後,與周星馳合作多年的助手以「珊珊你好」回復林允,足以証實珊珊一角將繼續由林允出演。

不過,最好笑嘅係網友見到林允所指的化妝台有一座山咁高的化妝品同保養品之後,紛紛留言希望佢能好好專注演技,而非做一個「被演戲耽誤了的美妝博主」。

新任星女郎SNH48成員孫珍妮,同林允都幾似。(網上圖片)