黑澤明逝世20周年　港人拉隊去東京睇海報展朝聖

黑澤明，相信大家即使冇睇過佢執導嘅戲都聽過呢個名。雖然佢已經離開咗呢個世界廿年，但影迷對佢拍嘅《羅生門》、《七武士》、《影武者》同《亂》等30齣電影都熱情未減，甚至好多大導演都參考過佢嘅拍攝手法，包括《星球大戰》系列嘅佐治魯卡斯同香港導演杜琪峯。

最近，東京國立近代美術館就為咗紀念黑澤明逝世20周年，將於4月17日至9月23日舉行特別展覽，展示30幾個國家、地方嘅黑澤明電影作品海報，而呢個亦係日本國立電影檔案館首次搞嘅展覽。有影迷知道咗呢個消息就話一定要去，呢個情況更唔局限於日本影迷，香港直情有人話要拉隊去添，溫馨提示一下啦，5月18日係日本嘅全國博物館日，嗰日睇展覽係完全免費嘅。