吳業坤向陳奐仁挑機　努力舉鐵脫毒

陳奐仁成功谷肌，睇嚟真係刺激起好多人嘅鬥心，繼杜汶澤話要挑機後(杜汶澤為去沙灘做足準備　追擊陳奐仁變肌神：做唔到，我去死！)，最新一位加入戰團嘅竟然係毒男代表坤哥吳業坤。其實坤哥之前都曾經一度想脫毒學人做下gym，亦曾經叫有啲成績並且在社交平台PO下圖炫耀下，可惜練練下又冇晒下文，肌肉照亦隨之消失，打回原型做返毒男一條。

不過最近坤哥可能俾陳奐仁刺激到，終於的起決心重返健身室舉鐵兼做平板支撐，亦放埋圖表示自己好有決心。睇相見佢手臂同大腿都開始練到啲肌肉感，兼且做到流晒大汗，真係好有決心挑戰下陳奐仁。希望坤哥今次唔好3分鐘熱度，可以變埋肌男同陳奐仁杜汶澤一齊去沙灘啦。