【VR驅魔人】詹瑞文終於肯演認真角色？　「其實我咩都肯做」　　

戲劇大師詹瑞文（詹Sir）一直甚少拍劇，最近卻因王貽興、劉翁（Sunny）誠意打動而出山參與ViuTV新劇《VR驅魔人》拍攝，他出席記者會便指自己是想與王、劉兩位仁兄，為觀眾製造驚喜：「個角色同我一般嘅演出好唔同，唔係喜劇橋段，我係演一個認真到有少少過火嘅人。」

問是否好玩過做喜劇？詹Sir答謂：「其實做戲最重要係唔好限死自己，但拍戲拍劇時通常導演都會對演員有個想像，例如想將我嘅喜劇部分發揮多啲，但佢兩位覺得喜劇以外嘅我係好好玩嘅一部分，因為觀眾冇見過。」

提到詹Sir在西貢有間Café，問是否因為生意好所以近年減產？他坦言一直都有做演藝相關工作：「成日要飛來飛去，國內有舞台劇、教學工作，呢幾年都慢慢咁建立到啲機會。（即係唔拍戲都搵到食？）我從來唔當演藝事業係搵食，我係好豐儉由人，其實我咩都做，最緊要係做自己開心做嘅嘢。」他亦透露九月會在香港演舞台劇《唐吉訶德》，飾演主角唐吉訶德，兩星期後會到法國與老師排戲。