【飛虎之潛行極戰】吳卓羲收友情價接拍:片酬係抵畀,我係抵用嘅

撰文:
最後更新日期:

《飛虎之潛行極戰》是邵氏和大陸優酷合拍的一套重頭劇集,今日在香港影視娛樂博覽舉行宣傳活動,三大男主哥中,三哥苗僑偉缺席,兩位已離開無綫的小生黃宗澤和吳卓羲(Ron)則有現身。吳卓羲自從2015年的《梟雄》之後,就再沒有在TVB出現,除了在大陸拍劇之外,還有電影的工作,離開以後也只有更加忙。

《飛虎之潛行極戰》今日舉行宣傳活動。(陳順禎攝)

今次重返老家拍劇,人工是不是比以前多出幾倍呢?在接受《香港01》訪問時,他說:「老實講都幾好嘅,都係收緊市價囉,打咗折喇。(人工多幾多?)唔好講呢啲喇,其實係滿意嘅,自己亦好想拍呢部劇,片酬都唔係考慮方向,亦都係經理人代我去傾。又有片酬又可以拍到部好劇,(又可以幫TVB?)其實呢部係邵氏嘅,唔係TVB。其實你都知吳卓羲拍咗好多警察嘅角色,可能邵氏係考慮到呢個原因所以叫我去拍喇,乜都唔使教嘛,片酬係抵俾嘅,我係抵用嘅。」的確阿Ron是接拍過不少警察的角色,《學警》系列就已經有三套。

人工一定好好,你睇佢個樣。(林迅景攝)

今次再次跟黃宗澤合作,不其然令人想起他們當年跟林峰、陳鍵鋒、黎諾懿和馬國明組成的奧運六子,問到阿Ron會否再次拉齊人合作,他表示:「奧運六子呀?講五個先喇,我一路都想,我喺微博都有講過係好有回憶,好多fans或者電視迷都想我哋合作。奈何真係各有各忙,希望可以逐個逐個嚟喇,而家同Bosco拍,阿峯其實我哋一路傾緊可唔可以整一部玩吓嘅,都要睇時間同檔期問題。如果五個一齊拍一部戲就難啲,可能拍個廣告或者一個短片喇,等我哋再聚一聚,安慰到我哋之餘,又可以令以前睇我哋嘅觀眾勾返起啲回憶。」點解唔搵埋黎諾懿嘅?

五子好耐無重聚喇。(微博圖片)

上年,阿Ron拍攝了《拆彈專家》,算是他第一部有回響的電影。近期消息指出《拆》將會開拍第二集,不過阿Ron則表示未知有無自己份,他說:我睇到佢開,但唔知有無我份,要睇吓華哥劉德華點樣安排。無話一定電影嘅,例如好似今次飛虎咁,有啲好吸引到自己嘅題材,最重要係睇劇本,希望自己兩邊都有平衡嘅發展喇。」

唔知第二集有無佢份呢?(網上圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。