【南方有喬木】陳偉霆挑戰高難度角色　劇情簡介話：佢桀驁冷峻

就算各位唔知道誰是陳偉霆，但佢「的士舞」、「手指舞」等片段，相信大家都一定睇過。跳舞以外，陳偉霆近年亦喺內地擔正多部劇集男主角，其中《活色生香》一劇中嘅慘情戲，佢嘅哭相更被大家捧為熱話，成為繼佢03年新秀唱跳《Ra-men song》外另一代表作。不過，相信陳偉霆好快會有新嘅代表作面世，事關由佢主演嘅都市感情劇《南方有喬木》，將會喺25日於浙江、江蘇衛視播出。

據相關宣傳對劇中角色嘅形容，今次陳偉霆嘅內心世界相當複雜、極具挑戰性：「在不同階段有著截然不同的性格，一個是熱血飛揚的草根青年時俊青，另一個是冷峻桀驁的酒吧老闆時樾。反差的人物設定、錯雜的感情糾葛賺足了期待。」

的確，站在「食花生，睇好戲」嘅立場，相信觀眾都好期待陳偉霆嘅演技大爆發，究竟佢會點樣演活「唔敢面對過去、暗啞底始終係自卑，但又要扮晒堅強」嘅時樾呢？嗯，諗起佢喺《活色生香》個埸哭戲，諗諗究竟個角色咁複雜係要玩佢定係考驗觀眾忍笑能力，就會覺得勁期待！

喺大家準備欣賞陳偉霆精湛演出前，先為大家簡介一下劇情打個底：嚟自遍遠山區嘅血性青年時俊青（陳偉霆飾），加入咗夢寐以求嘅部隊，但喺一次行動中因好兄弟常劍雄嘅舉動而孭鑊退伍。由呢刻起，佢變成桀驁冷峻嘅時樾。

時樾隨後認識女主角南喬，並發現女方同自己孭鑊退伍一事有關聯，於是刻意接近，又不禁動咗真情，同時當年嘅好兄弟常劍雄原來又係情敵，前塵往事、愛恨情仇一觸即發。