2018影視界十大現役美魔女 講樣講身材完勝後生女

撰文:
最後更新日期:

「美魔女」三隻字相信大家一定唔陌生,更加深知被叫得做「美魔女」嘅話,年紀亦都有番咁上下。講得咁白對女士嚟講相當失禮,喺度講聲唔好意思,但亦都奉勸無謂再在意呢啲無意義嘅數字,因為美魔女們,講樣講身材、講膚質講氣質,你哋全部完勝班十幾、二十出頭嘅妹妹仔,而且直到呢個年紀、今時今日2018,仍然係電影、電視界別嘅搶手貨。單單呢點,班後生女已經望塵莫及啦。

五十有二,keep得住呢個樣同身材,心心眼是常識吧!

羅霖(52歲)

1991年亞姐冠軍,之後轉投無綫,於1996年憑《真情》雙雙一角先較為令人有印象。羅霖同年嫁人做人妻,並逐漸減少幕前演出。直到2012年離婚,重新投入幕前工作,又以美魔女做賣點出寫真,成功憑保養得宜嘅外貌同火辣身材成為美魔女佼佼者。2017年重返無綫拍攝劇集《宮心計2深宮計》,該劇將於2018年中旬播出。

當年的黃蓉,記憶猶新!(視覺中國)

米雪(62歲)

邵氏影視藝員訓練班出身,成名作為1976年佳藝電視的劇集《射鵰英雄傳》中黃蓉一角,就算歷年來有眾多女演員飾演過黃蓉,但仍有不少觀眾一致認為米雪最能演活俏麗可人的黃蓉。直至近年,她仍有參演很多叫好叫座的劇集,如無綫劇《溏心風暴》、《宮心計》、《大太監》等。與羅霖一樣,有份參演《宮心計2深宮計》,且劇集以外尚有電影、舞台劇等於本年度面世。

事業心重的海味,工作無停手。(微博圖片)

周海媚(51歲)

陳年舊事唔再講,單單2014年憑《武媚娘傳奇》喺國內爆紅,就知年紀對佢嚟講唔係一個限制,而且更提醒世人,當時已48歲嘅佢仍然靚到揼一聲。之後每年都有劇拍,今年更有份再度拍攝新版《倚天屠龍記》,繼1994年飾演過周芷若後,今次轉演滅絕師太,相信呢位美魔女喺劇中依然吸睛。

+3
+3
+3

年齡唔係限制,煒哥有的是身材!(視覺中國)

陳煒(44歲)

煒哥相信唔需要多介紹啦,幾乎晚晚都喺TVB見到佢,入晒屋咁制,而且劇集長拍長有。44歲仲咁捱得,而且仲有本錢經常晒三點式身材,三個字:「玩晒啦!」

+5
+5
+5

人妻楊卓娜亦曾為劇集而被注意。

楊卓娜(40歲)

經由胞妹楊怡推薦先開始有較吃重戲份嘅角色可以飾演,但當時已經33歲。不過佢之後愈演愈入屋,特別係處境劇如《誰家灶頭無煙火》、《愛·回家》等。現時已成為TVB女配角級數中,較為重用的女演員之一。

張可頤呢個狀態,連妹妹仔都會羨慕。(微博圖片)

張可頤(48歲)

除咗14、15年香港電視嘅《來生不做香港人》之外,張可頤喺香港嘅作品絕無僅有,但就Keep住每年一套內地劇,有時又會拍下電影,影視工作唔算多,足夠就好。咁識享受生活,難怪48歲仲保持到當年無綫花旦年代嘅花旦樣。

+4
+4
+4

不施俗粉都有高質素,自信的表現。(網上圖片)

袁詠儀(46歲)

有名你嗌靚靚,就算已經46歲,但都唔會差得去邊!隨住阿仔張慕童愈嚟愈大個,唔再黐身,靚靚近年亦重新再戰幕前,特別係經常參與內地綜藝節目搵真銀。至於劇集方面,產量唔多,但聊勝於無啦。

+2
+2
+2

食咗防腐劑?個樣唔識老嘅?(網上圖片)

佘詩曼(42歲)

1997年港姐出身,前TVB一姐、首位香港雙料視后……名銜多多就知佢唔嘢少。「最當打年代」絕對唔適用於佢身上,因為一直以嚟keep住有產量有質量,更屈機嘅係樣同身材同佢做女時無咩分別,難怪電影《棟篤特工》海報上一對美腿,就算佘詩曼講到明對腳唔係自己嘅,但一樣有人覺得儘管唔係不過都差唔遠。

宣萱曾講過勤保養係不二法門。(視覺中國)

宣萱(47歲)

47歲仲係妹妹仔咁膚質白滑、身形窈窕,皆因食得健康、勤保養、適量運動!上年更憑《不懂撒嬌的女人》再令港人對「宣萱」兩字引頸以盼,特別係再度孖古天樂、林峯合作嘅電影《尋秦記》。

不需多作解釋吧!(IG圖片)

劉嘉玲(52歲)

嘩!美魔女又點少得嘉玲姐,壓軸位置非佢莫屬。每年都有電影作品面世,每次行出嚟都有滿滿嘅女皇風範,而且經常以deep V晚裝現身,姣好身材真係令人嘖嘖稱奇。唔好話男性,就連女士們都心心眼,羨慕非常。

+3
+3
+3


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。