古巨基重做主持訪問民間特首 劉德華笑評:你都係做返歌手啦

撰文:
最後更新日期:

昨晚食飯時間打開電視,睇住陳貝兒主持緊《東張西望》,但把聲……竟然係男人聲嚟嘅!搞咩鬼呀?鏡頭拉返遠,原來陳貝兒身邊坐住個古巨基,嚇得我吖。原來古巨基重返TVB做嘢,係想體驗返當年藝訓班畢業後做過嘅工作,仲美其名為「初心再體驗」添。

古巨基驚喜現身《東張》夥拍陳貝兒做主持。(TVB節目截圖)

古巨基有過唔少主持節目嘅經驗,不過昨晚佢嘅表現就有啲......應該係話仲有啲可進步空間,事關有唔少時候都係靠陳貝兒一個一輪嘴咁支撐大局,古Sir好多時都講唔夠幾句說話,而且每次開口接話都係幾秒上落,特別係準備介紹「自動駕駛車撞死人」嗰部份。

或者可能係緊張嘅緣故啩,畢竟古巨基初入行時做過無綫《娛樂新聞眼》嘅主持,今次要重執《娛樂新聞眼》支咪,再次訪問已上神枱嘅劉德華,緊張係人之常情,就連接受佢訪問嘅劉華都取笑佢:「我check吓你手心先。嘩!仍然係咁濕。」

除咗手心濕晒,古巨基講嘢更周不時口窒窒,問嘅問題亦太正經,唔好怪講得太誠實,呢段訪問有啲啲悶,尤其係同佢以前訪問劉華時一見面就衝上去錫一啖相比。好彩,佢最後一個問題夠精警,劉華亦答得夠抵死:「(你覺得我今天做主持……)比以前差呀!你都係做返歌手啦,哈哈。」

劉華嘅回應真係好鬼正!(節目截圖)

劉華講得啱,唱歌嘅古巨基係最正嘅,而佢近期頻頻現身,又上《流行經典50年》、又客串《愛·回家之開心速遞》做客串外賣仔,最主要目的都係增加曝光力谷嚟緊紅館演唱會啫。所以,大家應該唔難發覺,踏入2018之後古巨基老是常出現,不單個人社交網絡更新得密咗,內容涉及嘅範疇多咗,打機、砌模型、打麻雀等等等等,誇啲講就係包羅萬有,俾人感覺係想盡量接觸,甚或滿足唔同喜好嘅觀眾。之後又搵嚟近期人氣爆燈嘅子華神同佢一齊孕育《子華說》。男神都為你入錄音室撳緊張掣。日前又一身科幻戰士look走到街上挑戰發呆一分鐘,隨即又走入人群搭埋巴士,拉近同市民嘅距離,形象十分親民。咁多諗頭咁多搞作,邊個夠你玩呀古Sir。

+7
+6
+5

順帶一提,昨晚一集《東張》播出兩段古Sir青澀年代做主持時,訪問劉華時玩咀嘴、訪問王菲時中鳥糞、訪問林志穎時聽唔明對方普通話講咩嘅經典片段,大家不妨撳開條片睇吓吖。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。