方東昇爛Gag導航《長命百二歲》 探討沉重老人問題仍然好幽默

撰文:
最後更新日期:

無綫記者方東昇以幽默方式,聲音導航《世界零距離》系列,帶大家認識世界之餘,亦令大家認識佢嘅爛Gag,諸如:「今日玉樹臨風,明日可能弱不禁風」、「人在跌倒中成長,跌跌下你就會發現,歲月不撓人,起身見頭暈」。

佢呢啲同老人相關嘅爛gag,當時以為只係隨口噏當秘笈,真係估唔到佢真係走咗去探討老人問題,節目名叫《長命百二歲》。

方東昇貫徹《世界零距離》系列風格,幽默方式主持新節目。(網上截圖)

以方東昇嘅說話去簡單介紹下個節目:「呢個世界愈嚟愈化,全球化、數碼化,仲有呢個節目最關心嘅人口老化。『長命百歲』已經過時,活到百二歲係遲早嘅事,但究竟係祝福定係詛咒?我哋走訪兩岸四地,零距離接觸各路耆英,包括直擊日本美魔女大賽、解構南韓仔女帶父母一齊去孝道整容現象。」

各位,方東昇上述幾句說話,係咪齋睇字都覺得好有趣,好想睇呢?但其實一個咁沉重嘅話題,方東昇聲音導航得最funny都好,最後都會令觀眾睇到有啲心噏,試諗諗香港部分老人家咩境況:住籠屋、獨居無人理、喺安老院「安享」晚年,定係仲執緊紙皮,經過垃圾桶順便睇睇仲有咩食得?節目話俾我哋知,有啲問題更加係我哋諗都未諗過,包括每日最少沖一次涼咁簡單嘅事,對老人家嚟講,特別係長期病患需要卧床嗰啲,沖涼原來可以好難得。

節目提到:「有啲人情願使錢俾寵物出去沖涼,都唔願使錢俾長期病患需要卧床嘅父母享受洗澡車服務。或者我哋一日最少沖一次,無咩特別,但對卧床長者嚟講,半年甚至一年先可以享受一次沖涼服務。難怪台灣當局有咁嘅宣傳口號:『澡』到幸福,『浴』見愛。」真係幽默之中又令人反思,方東昇真係好高質呀!

對卧床老人嚟講,沖涼原來係件幸福事。(網上截圖)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。