Youtuber屎萊姆淘寶買過期空氣：買呢樣嘢嘅人神經有問題

網絡紅人屎萊姆成日都拍淘寶開箱文，今次佢喺淘寶淘咗樣嘢，令佢自己都覺得不可思議，不知所謂，點解自己會走去買呢樣嘢，佢今次開箱嘅係購自淘寶嘅「空氣」。

屎萊姆喺影片中話佢所購買嘅係來自加拿大洛磯山脈的「純淨空氣」，當中21%係氧氣，79%係氮氣同其他無意義氣體。每一罐空氣售價129蚊人民幣（約港幣150元），以每罐8升計，即係差不多一啖1蚊，屎萊姆話覺得用百幾蚊買呢罐嘢嘅人神經都有啲問題（即係話緊佢自己）。但最令佢崩潰嘅係，佢駭然發現罐空氣已經過咗期整整一年，佢自己都忍唔住話：「我畀百幾蚊四罐空氣已經夠傻，仲要係過期嘅？」

睇返淘寶，除咗呢啲加拿大空氣，仲有來自日本富士山同內蒙呼倫貝爾嘅空氣，當中最平，銷量最高嘅係內蒙呼倫貝爾嘅空氣，58蚊人仔一罐，第二罐一蚊，都有二百幾個交易。而淘寶賣家仲貼心建議可以將呢啲「空氣」用作日常呼吸、旅遊紀念品同創意送禮，媽咪呀，真係好驚聖誕聯歡會抽到呢啲「新鮮空氣」。