《反黑》將現荷李活世紀級最強反派 導演宋本中:佢無人不曉

撰文:鄺鈺瑩
出版:更新:
雖然劇本仍在創作中,但宋本中就進度唔算落後。

由陳小春、陳國坤、李璨琛等主演的4K網劇《反黑》去年播出後好評如潮,第二季亦已落實開拍,雖然導演宋本中曾經話過預計係2月左右開拍,但一直只聞樓梯響,再睇睇《反黑》FB專頁,日前就上戴了一批新海報,並寫上OCTB season 2 is coming soon!呢個soon字真係可圈可點……
 

宋本中話第二季預計會有多一倍的演員加入。

宋本中接受電話訪問時,就話劇本仍在創作中,進度大概係5成左右。「因為今次規模變大了,所有嘢都要好小心咁進行,再加上又諗到啲新嘢,例如係多番少少動作埸面,所以劇本又要再執。」宋本中笑言由於近期有不少公司舉行春茗,他也要人性化一點讓陳小春、陳國坤等人搵吓真銀。
 

食人醫生呢個經典角色,真係可以同招積拍住一齊上。

宋本中透露自《反黑》於Netflix上架後,成績斐然,雖然自家製劇集如《怪奇物語》(Stranger Things)、《漢娜的遺言》(13 Reasons Why)、《毒梟》(Narcos)等有不俗的口碑,但《反黑》長期佔據於第一、二位。宋本中:「《反黑》上架之後,多了70萬用戶登記(免費試睇一個月),當中有40萬是有之後再繼續俾錢。西班牙、哥倫比亞同星馬地區特別受歡迎。」Netflix方面見到有如此佳績,決定大力支持《反黑》之後的製作,更提出「可以幫手搵演員」的建議。

「我有心水架啦,不過你都知唔可以透露,我只可以話係世紀級最強反派,衝出宇宙、無人不曉。(莫非係《雷神》中飾演Loki的Tom Hiddleston?)唔係,呢個真係世紀級,不過就算成事,都只能在第三季出現。」講到世紀級反派……《Esquire》英國版就曾經舉行過全球百大反派,入位者除已故的Heath Ledger(希夫烈格)外,《沉默的羔羊》男主角兼金獎影帝安東尼鶴健士(Anthony Hopkins)、如果佢同招積一齊孖住食人都確係可以配合晒劇情發展。又或是《星際大戰》中黑武士都屬於榜首之列,到底係邊個呢?宋本中就話有好消息會即時同大家分享。

講到衝出宇宙的反派,點會唔係Loki!但導演已光速否認了。(網上圖片)
Netflix王牌劇集《紙牌屋》男主角兼金球視帝奇雲史柏西(Kevin Spacey ),都可能係考慮人選之一。(網上圖片)

另外,提到Youku自家製劇集《白夜追兇》同樣被Netflix購入,但卻遲遲未上架,問到宋本中有無睇過《白》,他就表示不願置評。據知,由於《白》為優酷重本自家製劇集,對比起《反黑》這外購劇,有關方面多次出手打壓,亦未知是否因為這原因,宋本中日前曾在朋友圈發文表示「家下搞影視好似宮心計」、「連尊重知識產權都唔識」。
 

Netflix有過百部劇集上架,但《反黑》仍然可以穩守第一、二位,而且吸納大批新客,難怪Netflix主動話幫手搵外國演員啦。