【果欄中的江湖大嫂】馮盈盈遭御用強姦犯強暴?李天翔獲讚好好人

撰文:
最後更新日期:

TVB有唔少御用角色,除咗有李國麟做「御用敗訴王」、宣萱做「人質王」之外,仲有李天翔都係為人所熟悉嘅「御用強姦犯」。昨晚劇集《果欄中的江湖大嫂》就預告李天翔疑似將「又」要強姦人,今次對象係馮盈盈(Crystal)所飾演嘅小狼女。

《果欄中的江湖大嫂》預告李天翔疑似將「又」要強姦人,今次對象係馮盈盈(Crystal)。(合成圖片)

李天翔入行20多年,早年因為認字特警一角而為人所熟悉。自2008年起,李天翔開始於劇集中擔任奸角,更因為經常飾演強姦犯角色而被標籤「御用強姦犯」。李天翔雖曾經表示演強姦戲「駕輕就熟」,亦因為佢在劇中強暴過嘅女演員多數都係一線花旦,令佢背負一個「強姦了全電視台女演員」嘅「罪名」,外人可能覺得佢艷福無邊,但李天翔就叫苦連天,呢個身份令佢非常尷尬,亦係佢之前決心向TVB提出轉為兼職演員嘅原因之一。本來以為轉做兼職演員有更大的自由度,甚至可以將「御用強姦犯」呢個頭銜寫進歷史,但今次好似都係走唔甩,要再做強姦犯?

因為拍太多強姦戲,李天翔背負一個「強姦了全電視台女演員」嘅「罪名」,呢個身份令佢非常尷尬,亦係佢之前決心向TVB提出轉為兼職演員嘅原因之一。(IG圖片)

同李天翔喺《果欄》中有大量對手戲嘅Crystal,接受《香港01》訪問,佢話有聽聞過李天翔是「御用強姦犯」,而對於強姦戲份則大賣關子,不過佢就對呢個拍檔讚口不絕,話佢係一個非常專業同有氣場嘅演員,「我第一次見到天翔真人行出嚟,我已經驚到腳都震埋,有啲場口佢要大聲喝我同鬧我,我要唔可以退縮同埋要好有氣勢咁頂返轉頭,但其實我內心眼淚鼻涕都想流出嚟,佢嘅氣勢真係好勁,畀佢喝一喝,我已經爭啲跪低,但個樣要扮到好有信心咁,其實真係好~難呀!」

馮盈盈大讚李天翔係一個非常專業同有氣場嘅演員。(IG圖片)

Crystal話雖然天翔埋位時氣場強勁,但鏡頭外嘅佢其實好親切,Crystal仲多次大讚佢好人,「今次係我第一次拍劇,所以我好緊張,有時想喺片場影吓啲花絮相做紀念,但又唔夠膽,又好怕醜,天翔知道我唔夠膽影相,佢一得閒就拉埋我一齊合照,又有時我拍緊,佢得閒嘅時候,佢好好心咁幫我影花絮,等我有相Po吓,佢真係好好人。」

Crystal大讚鏡頭外嘅李天翔非常親切好人,知佢唔敢喺片場影相,主動拉佢一齊影。(IG圖片)

除咗幫Crystal影多啲片場相留念,天翔都有教佢做戲,Crystal所演嘅小狼女大獲好評,應該都要Credit返天翔,「有好多好長嘅獨白,我第一次拍劇,我真係唔知點去分析劇本同演繹,天翔係逐段逐句咁教我,用咩語氣去講對白,邊度係高潮位,邊啲位要加感情,佢真係好好人,雖然天翔畀大家喺『強姦』方面嘅印象好深刻,覺得佢好惡,但其實佢好好人好親切。」

馮盈盈初次拍劇已經大獲好評,佢話多得李天翔教佢演戲。(影片截圖)

+2


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。