【反黑】招積外傳隨時開拍 張建聲:交代佢成魔之路

撰文:
最後更新日期:

觀眾等了又等,終於等到招積外傳……雖然未咁快開拍。

張建聲憑《反黑》招積一角做到街知巷聞,招積的狂妄同變態又確係令不少觀眾留下深刻印象,《反黑2》劇本雖然仍在創作中,不過可以預計到,第一季大結局時敗走的招積一定會強勢回歸。

《反黑》2會有招積的出現,但未必有太多篇幅交代他成魔之路。

宋本中:Netflix好有誠意

隨著《反黑》於Netflix上架後,為其帶來巨大的收益,有關方面已表明會全力撐《反黑》,除提出「幫手搵荷里活演員加盟」的建議外,原來連帶宋本中之後的作品,Netflix亦已表明有興趣,當中包括觀眾都好期待的招積外傳,宋本中接受訪問時表示:「有一部CID系列籌備中,入面會講PTU,而老鬼(王合喜飾)老婆係PTU阿頭,即係老婆比老公職位仲要高,而呢個故事顯伸落去就會出現埋招積,亦即係招積外傳。」

由於Netflix特地派人飛到香港與宋本中商量合作大計,令他感受到對方的萬分誠意,故他亦希望交出最好的作品予對方。「《反黑》會有劇場版,呢個上一季已經想做,第二季要實行,觀眾睇完劇集之後可以入戲院再睇,內容當然會一樣啦。」除了《反黑2》、以及CID系列之外,宋本中亦打算開《拳神》,並起用陳國坤以及陳惠敏做主角。

張建聲有今日的成績,導演宋本中應記一功。

張建聲預5月開工

招積的真身--張建聲接受訪問時就話其實一直都有同宋本中透露接下的劇情發展:「好多觀眾、喜歡招積的朋友成日都問,幾時會交代點解會變成招積,咁外傳我係會想交代佢成魔之路、點解會做古惑仔、跟錯大佬等等,由少年時代開始。」張建聲指招積的的四個階段已在第一季展現,預計外傳開拍時,會有更多不同的變化。「一定會將自己放埋入去,例如係我以前較為慘的經歷,因為你唔將自己感情融入去,好難會做到觀眾想要的東西。」

對於能夠擁有招積外傳,張建聲表示十分感恩,問到會否乘機加價,他表示與宋本中為好兄弟。「加都唔會加得多啦,導演好好,成日都送禮物又請去旅行。」張建聲透露剛完成電影《作家的謊言》,接下來會為《P風暴》開工,拍攝完之後剛好為招積外傳開工,預計是5月左右。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。