【任噏亂評‧VR驅魔人】有人情味就夠?王貽興劉翁犯咗新導演通病

撰文:陳栢宇
出版:更新:

電訊魔童王維基放棄繼續申請電視牌照,雖然可以話係意料中事,但呢件事對一班仍然心愛港產劇集、電視節目嘅人嚟講絕對唔係一件好事,最起碼咁樣係意味住再冇巨人可以撼動到另一個巨人。不過,仍然有一班人唔相信命運,仲覺得有啲嘢係值得做、應該做,就好似王貽興、劉翁(Sunny)兩個咁,最近佢哋兩個就自編自導自演咗一連廿集嘅ViuTV新劇《VR驅魔人》,過去嗰兩晚就已經播咗兩集。

唔知大家對王貽興、劉翁主理嘅《VR驅魔人》有咩感覺?

喺呢套號稱「可能係史上最多串星」嘅劇集裡面,貽興同Sunny就飾演返自己,做一對四圍撲水諗住開港產恐怖片嘅好兄弟,但一班老闆淨係對「VR驅魔」呢件事有興趣,所以佢哋兩個就發現呢件事其實有商機,然後就周圍搵人戴呢個VR裝置,以幫人捉鬼嘅名義呃人錢,但中途卻誤打唔撞咁幫咗好多人解開心結,而頭兩集佢哋就先後向飾演Sunny舅父嘅葛民輝同埋飾演妓女嘅鄧月平(Larine)埋手。

故事就係講貽興同Sunny兩個人借VR驅魔呢單嘢去周圍呃人,但點知撞手神地幫咗好多人解開心結。

聽落就好似幾吸引、好有港式人情味咁,但實際上係唔係咁嘅一回事?齋睇頭兩集就真係爭少少喇,特別係第一集裡面存在住好多沙石,有好多方面都可以做得更加好。我好明白呢個故事裡面有好多嘢都好值得交代同舖陳,但係作為一個創作人亦都要識揀當中有邊樣嘢係最值得講,唔應該太過貪心,如果唔係就會因為樣樣嘢都講而搞到成件事都到喉唔到肺。

第一集裡面有唔少沙石,樣樣都有啲咁,搞到到喉唔到肺。

最明顯嘅例子就係喺第一集裡面,飾演貽興婆婆嘅余慕蓮話貽興因為拍咗《謎》而畀人笑足咁多年,而貽興就應承余慕蓮會畀心機搵錢等佢可以住大屋咁。其實呢一幕係第一集最好睇嘅一幕,因為貽興可以話係完全真情流露,更透過呢一幕同現實已經離世嘅婆婆隔空對話,好可惜呢場戲對於成集搞VR見鬼、搵葛民輝做白老鼠嘅劇情係毫無幫助,硬生生加插咗呢一部份,成件事有啲突兀之餘仲走走哋Tone。如果真係好想講呢一Part,就應該獨立用一集嘅時間去發展呢條線。

其實呢一幕貽興同余慕蓮真係做得好好,甚至睇到觀眾眼濕濕,但係喺劇情處理上係唔需要出現。(電視畫面)

另一樣嘢亦都係好嚴重、好影響到第一集嘅觀賞感受,就係貽興、Sunny花咗唔少嘅時間同篇幅去自己抽自己水。對於認識佢哋經歷嘅人嚟講,呢啲真係一兩句就已經好足夠;對於唔清楚佢哋背景嘅觀眾嚟講,佢哋更加係想睇套劇嘅劇情本身。不過,上面講過嘅情況喺第二集已經改善咗好多,最值得一讚嘅係林兆霞(即係《志明與春嬌》系列嘅Brenda)嘅亮相極其恰到好處,成件事嘅搞笑程度升咗幾個Level,雖然之後Sunny變咗著殭屍衫嚇人好冇頭冇尾。

Sunny扮殭屍嚇人呢一幕又係好冇頭冇尾咁,如果真係有必要交代,應該要加長篇幅。

到底係咩因素導致成套劇硬係爭啲咁?其中一個原因一定係貽興同Sunny都當正今次《VR驅魔人》係最後一次咁做,可能就係因為咁,所以就好想將可以擺到嘅嘢都盡量放落套劇裡面,喺修剪一啲旁枝末節上變得冇咁謹慎,依呢個問題經常喺一啲新晉導演嘅首作裡面搵到。第二個原因,可能係呢套劇實在有太多藝人幫手客串,如果唔畀返適當嘅播出份量佢哋好似對唔住佢哋咁,最後就搞到多咗啲可以刪減嘅畫面。其實外在框架結構都可以係一個原因,始終喺不足半個鐘嘅時間裡面,交代要交代嘅嘢係一件唔容易嘅事。

太多串星,可能係其中一個因素令到劇情總係爭啲咁,當然多串星呢樣嘢都係賣點嚟。

雖然好似踩得好盡咁,但其實大家都好應該繼續支持呢套作品,點解?就係因為呢套劇有一份屬於香港人獨有嘅人情味,雖然兩個主角都係市儈底,但你會喺佢哋身上搵得到香港人應該有嘅勇氣同埋良知,就好似即使貽興好驚鬼,都鼓起勇氣衝入Larine「開工」嗰間房,幫佢拎走佢死咗嘅男友留低畀佢嘅波鞋咁。對於有Heart嘅人,佢哋需要嘅係支持,隨住第二集嘅處理手法變得成熟同爽快,相信之後嘅集數都會愈來愈好睇,畀次機會佢哋兩個,亦係畀次機會ViuTV,同時都係畀次機會自己。

至於會唔會棄劇?大家真係應該可以畀多幾次機會,因為套劇有一份依家好難搵到嘅港式人情味喺度。
+13

想睇更多評論?即Click↓

【黃子華‧任噏亂評】黃牛只有一個方法解決 實名?考試?都不是

【任噏亂評】如果周杰倫連十首歌都唱唔足 場騷仲值唔值得睇?

【任噏亂評】TVB十大25歲或以下潛質女星 年齡最細只有20歲