【果欄中的江湖大嫂】硬加強姦戲劇情好牽強　馮盈盈好彩逃出魔爪

無綫劇集《果欄中的江湖大嫂》昨晚播出一集的戲肉當然是小狼女 (馮盈盈飾) 被Kent (李天翔飾) 強姦的一幕。TVB一向好鍾意在劇中安排呢類強姦的情節，今次呢套是馮盈盈首套主演的劇集，估唔到就安排場咁激的戲給她，要她處女作就被強姦。有網民甚至在昨晚那集播出前已經開定Post討論，事前FYY又喺ig造勢，大家昨晚坐定定，等睇呢一幕，真係心情好矛盾，真係唔想睇到小狼女被姦。未知是否TVB都好明白觀眾的心意，所以昨晚場強姦戲變成險姦戲，亦即是沒有發生。。

雖然霸王硬上弓唔得，但個理由會唔會兒戲咗同牽強咗呢，明明Kent話咗要強姦小狼女，已經將她按在枱上仲撕破了她的上衣，小狼女亦都好痛苦咁掙扎，點知葡撻 (許家傑飾) 被Kent的同黨爆樽之後，Kent就即刻放晒手唔強姦小狼女了。有冇攪錯呀？之前兩條跟班都打到葡撻死咁滯，你仲色心起，點會見到佢俾人爆樽就突然獸性大減呢？斷估唔會因為Kent準備強姦小狼女之前是同葡撻講過：「你想保護佢吖嘛，我就做場好戲畀你睇！」，之後見佢暈咗，所以唔駛再做呢場好戲呢？唔係話期待睇呢類戲，電視程度有幾大心中有數，但都起碼合理少少囉。

據悉，當日有份拍攝這一場戲的TVB演員對於劇情如此發展，都覺得愕然，因為整件事變得不連貫，明明李天翔已經撕爛了馮盈盈件衫，卻竟然因為許家傑被爆樽就放過馮盈盈，兩件事根本不存在直接的因果關係，劇情因而變得奇怪。有指TVB其實並不想有強姦場面，但又想不到用甚麼理由令原本想要強姦馮盈盈的李天翔突然煞制收手，所以就用一個咁牽強的原因來了事算數。