湯洛雯細個鐘意著褲似男仔 阿媽後生被讚似鍾楚紅
撰文：冼燕珊
出版：更新：
湯洛雯(Roxanne)有個朵叫做「靚湯」，但原來小朋友時期嘅靚湯係一名男仔頭。湯洛雯IG po咗幾張童年照，其中一張係同媽咪嘅合照，相中嘅佢剪咗個「郭富城中間分界頭」，戴住一黑超仔，擺出一個cool cool地嘅剔手勢，成個男仔咁款，唔講真係唔知佢就係依家嘅靚湯。
湯洛雯小時候真係好似男仔。(IG圖片)
湯洛雯接受《香港01》嘅訪問，笑言小時候真係好男仔：「細細個人人都以為我係男仔嚟，細個又唔鐘意扮靚，又成日鐘意著褲，所以我媽咪都懷疑係咪生曾咗，嘻嘻。」真係估唔到今日女神級嘅靚湯，細個係鐘意著褲多過著裙，好在大大吓，終於變返個女仔，佢話係自從中五過咗去英國之後，先識得開始扮靚。
先言細個男仔頭嘅靚湯,去英國之後終於開始識扮靚。(IG圖片)
睇返靚湯媽咪，頭戴帽加黑白冷衫，呢身裝扮今時日著出街都唔Out，湯媽望落仲好有星味添，湯洛雯都話媽咪後生時好靚，「好多人話佢後生嗰時似鍾楚紅，佢聽到覺得唔好意思，因為佢覺得鍾楚紅好靚，其實我睇返啲相都覺得佢有啲似（鍾楚紅）。」爸爸係演員湯鎮宗，叔叔係湯鎮業，而媽媽又似鍾楚紅，難怪靚湯咁靚啦！