范冰冰《巴清傳》疑因高雲翔禁播　亞視斥資2千萬貼錢中伏

范冰冰主演嘅古裝劇《巴清傳》本身已經因為收到好多話佢亂改歷史嘅投訴，所以一直都唔知幾時可以正式出街，而最近男主角高雲翔仲因為喺澳洲涉嫌性侵一名女子而遭當地警方拘留，因而搞到劇集禁播嘅消息不絕，令成個情況雪上加霜。唔好以為得范冰冰畀高雲翔累咗，其實近在香港都有受害者，而呢個受害者就係復活冇耐嘅亞洲電視。

亞視重新開台嘅時候就大肆宣傳各大節目，包括陳志雲主持嘅《百萬富翁2018》、直播節目《今晚見》等，但始終唔夠亞視以天價購入《巴清傳》香港獨家播映權呢件事矚目，更有指亞視不惜斥資2000萬去購入呢個版權。所以，今次傳出《巴清傳》因高雲翔而禁播嘅消息，亞視可以話係中咗個大伏。

亞視外事部總監曾醒明接受《香港01》訪問時就咁講嘅：「亞視係買咗《巴清傳》嘅香港獨家播映權，但個合約都係訂明咗香港同內地係同步播映，所以一切都要等內地有關單位公布，以佢哋嘅決定為準。」至於係唔係2000萬就咁凍過水，佢就話冇回應喇。咁係唔係代表住亞視住咗得個等字，就冇嘢可以做到？相信大家都有個答案。