cult片王《山狗》虐殺輪姦超變態 鄭則仕仍然心寒:覺得導演痴線

撰文:
最後更新日期:

1980年上映嘅《山狗》可以話係香港Cult片界嘅王中之王,故事就講述依家已經息影嘅莊靜而同佢哥哥艾迪一行五人去荒山露營,點知就遇到「荷蘭佬」王青、「高佬」鄺佐輝、「蛇佬」關鑑銘、「矮腳虎」同「病甩毛」鄭則仕呢五個壞人,之後莊靜而仲畀佢哋輪姦,而艾迪亦中伏慘死,最後陳星為一對仔女報仇,將佢哋一一虐殺。雖然當年得29歲嘅鄭則仕(Ken哥)喺戲裡面多數都係齋睇冇份做,但佢日前接受《香港01》訪問時就指呢齣戲隔咗38年都仲係咁深刻。

鄭則仕喺《山狗》裡面飾演「病甩毛」,性格戇直,好多時都係以旁觀者身份睇住啲壞事發生。(電影截圖)

+8
+7
+6

提到不時都有人翻睇、提起呢度舊片,Ken哥就咁講嘅:「我自己都好耐冇睇,但我好記得我係拖住隻光頭馬騮,莊靜而、鍾保羅去旅行畀我哋搞,我哋呢班人有王青咁。(劇情、畫面好癲,你都肯接?)冇所謂,有錢畀我嘛,哈哈!其實係我嗰時初初入行,唔介意做呢啲,做新演員就係要試多啲呢啲,係而家先會揀嚟拍。」

Ken哥話佢自己好少睇返《山狗》,但對好多場口都印象根好深。(黃國立攝)

余允抗係80年代新浪潮代表導演之一。(網上圖片)

至於拍之前有冇咩準備,拍嗰時又有冇提出意見改動細節等,Ken哥就咁答嘅:「導演講乜我就做乜,嗰時好細,入行一兩年,唔會諗太多,人哋導演由諗到拍用咗成年,冇可能我埋位就加意見話改啲嘢,當時我亦冇呢個能力。(最記得邊幕?)最後王青跌落水,我拖返佢上嚟喺度喊,不斷嗌表哥、表哥,仲有成班人輪姦莊靜而,我坐喺隔籬齋睇,好似好過癮咁,但其實成件事好慘。」

Ken哥仲好記得一班人輪姦莊靜而呢一幕。(黃國立攝)

講到依家港產片冇咗呢類咁大膽嘅戲,問佢覺得點解拍唔返時,佢就話唔可以話拍唔返:「其實個故事就即係旅行遇險記,要拍得暴力可能好易,但要有寄語就唔易。(有冇同導演余允抗聯絡?)冇啦,上市公司主席呀大佬,點聯絡佢。」好多人都話睇「蛇佬」關鑑銘睇到好心寒,Ken哥就話好佩服佢演得咁大膽:「佢死嗰時畀人倒吊,有百幾條蛇喺佢褲浪裡面,佢真係好夠膽。(現場睇到心寒?)我覺得導演好痴線!」

其實山狗導演余允抗係美國加州大學洛杉磯分校電影系畢業,系出名門。除了拍過《山狗》外,仲拍過很多港產片,例如本土鬼片經典《凶榜》,《飛虎奇兵》等,亦做過不少電影監製。至90年代,余允抗退出電影圈轉戰商界,並擔任多間上市公司主席同行政總裁,認真多才多藝。

Ken都覺得導演余允抗好痴線。(黃國立攝)

咁會唔會唔敢再接類似嘅戲?Ken哥答:「我冇話敢唔敢接,最緊要係我有冇能力掌控個角色,當年我立場嚟睇,意識正面啲就好啲,唔好太渲染暴力。(覺得《山狗》好渲染暴力?)嗰時冇得揀,依家就可能覺得拍少部咁,我啲小朋友出世後,佢哋13歲前我都好少做反派,因為唔想佢啲同學睇到,就同返佢哋講你爸爸好衰,唔想影響佢哋生活。」又笑指拍梁材遠嘅TVB新劇會開心啲。

Ken哥就話盡量唔會再接呢啲咁暴力嘅戲。(黃國立攝)

+15
+14
+13


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。