【開心速遞】型男Jacky同送水輝爭女　從後熊抱大小姐講我愛你

無綫處境劇《開心速遞之愛‧回家》有多CP都好受觀眾同網民喜愛，其中一對當然是大小姐 (林淑敏飾) 同送水輝 (許家傑飾) 啦，不過他們在劇中並未正式發展成為情侶，大小姐依然是處於暗戀到出晒面的狀態，而送水輝對大小姐的愛意亦已經萌芽。原本諗住大小姐一定走唔甩愛定送水輝一個，點知今晚播出的一集就出現了送水輝的勁敵喇！呢位在劇中名叫Jacky (黎振燁飾) 睇嚟將會力追大小姐。

昨晚的一集預告出現了Jacky霸氣情挑大小姐一幕，他從後摟實大小姐表示：「我鍾意咗你好耐，I love you！」又冧爆咁同大小姐講：「Exactly就係呢種喇，你呢啲先係我女神。」仲邊講邊輕掃大小姐鼻仔同捏她下巴，而大小姐對住Jacky的連串攻勢似乎招架不住。到底大小姐會否轉投Jacky懷抱呢？送水輝雖然靚仔，但呢位飾演Jacky的黎振燁 (Jackson) 亦一啲都唔弱。他是2016年香港先生冠軍，無論樣貌同身型都好有水準㗎。

已婚的Jackson向來予人「好男人」以及「好老公」形象，畢業於無綫第23期藝員訓練班，當年他是以「黎柏麟 (Maxi)」的名字加入，今年已是他入行第10年。由最初寂寂無名拍劇演一些路人甲角色，到2016年贏得香港先生冠軍，工作機會亦愈來愈多，拍劇的戲份亦多了，今次在《開心速遞》入面就同大小姐有不少對手戲。而他私底下亦不時在ig同老婆曬恩愛放閃。