林子善婚禮星級兄弟團　唐詩詠反串比馬國明鄭嘉穎更搶鏡

林子善同拍拖5年囓圈外女友Kary董佩欣，去年十月註冊結婚，嚟到4月3日補擺喜酒，於將軍澳筵開50圍。佢地搵嚟18人兄弟姐妹團，真係相當有氣勢呀﹗兄弟團包括劇集《鐵馬尋橋》一眾老友鄭嘉穎、馬國明、黃長興、袁偉豪、黃嘉樂等，唐詩詠更反串登場著上西裝擔任兄弟團，英氣十足一啲都唔輸蝕架。

唐詩詠喺IG貼出一張9位兄弟孖住新郎哥林子善嘅合照，留言話：「做兄弟係爽嘅，唔洗早起身，淨係Chok就得嘞﹗」咁又係呀，做姐妹團天未光要起身化妝整頭，又要準備遊戲，兄弟團都係出現俾人玩啫。唐詩詠分享咗一盆餅乾，唔係班姐妹擔心大家餓，因為每塊餅上面都有大大隻鹹竹蜂，配上芥辣醬，食完真係醒晒。馬國明指林子善講愛的宣言講到眼濕濕，最終當然就係成功接新娘嚟個世紀之吻啦。