【逆緣】殮房扮屍臨記最專業 陳家樂都讚:幾十歲撻一撻都大鑊

撰文:
最後更新日期:

估唔到《逆緣》呢個倫理恩怨情仇劇都有啲令人笑到爆肚嘅劇情,喺尋晚播出嘅一集臨尾嗰幾分鐘「香港隊長」陳家樂又好認真地做搞笑嘢。劇情就講到辭咗之前份工嘅黎耀祥第一晚喺殮房開工看屍,點知就撞正陳家樂以為自己老婆死咗要打包上黑箱車入殮房,之後黎耀祥就目擊住陳家樂「偷屍」,過程中兩人推推撞撞,陳家樂仲激動到流哂眼淚,到陳家樂一嘢拉開咗個屍袋,先知袋裡面唔係佢老婆而係一個唔識嘅阿伯。

尋晚《逆緣》嘅劇情就講到陳家樂以為條屍係自己老婆,喺殮房開工嘅黎耀祥阻止佢搶屍。(電視畫面)

好多網友都係討論區話呢一幕好痴線,笑到肚痛之餘,仲有啲似黎耀祥嘅「代表作品」《生化壽司》咁充滿黑色幽默。不過,有網友嘅著眼點就有啲唔同,覺得扮屍嗰個阿伯好慘,仲問要收幾多錢先肯扮條屍。我好開心可以代表《香港01》為大家解答呢個問題,一位前無綫臨時演員帶隊就話如果需要臨時演員扮屍,原來係要一早講定而且要睇下有冇演員肯做。

經過推推撞撞拉拉扯扯,激動到痴線嘅陳家樂先知條屍唔係自己老婆。(電視畫面)

呢位帶隊就咁講嘅:「除咗要睇有冇人肯做,其實仲要畀多一半人工嗰位肯做嘅演員。」實質啲嚟講,以最低工資每個鐘$32.5,呢場戲大約要拍四個鐘咁計,佢嘅人工就應該係$32.5乘4乘1.5,即係$195,其實都唔算好多。之後佢亦都補充:「喺人工之外,我哋都要封返封利是畀嗰個演員,但唔會多,都係硬幣一個。試過有演員唔記得收,之後真係睇到嗰啲嘢。」

以前做過臨時演員帶隊嘅受訪者就話,試過有臨時演員因為扮屍後唔記得拎利市,最後見到鬼,真係信不信由你。(電視畫面)

至於難唔難搵人做鹹魚?另一位前無綫臨時演員帶隊就咁講嘅:「最緊要係唔導演唔好揀樣,唔揀樣嘅話會有好多唔好樣、條件唔好嘅臨時演員肯做。之前我仲喺TVB做,試過要搵一個女人,喺未到年初十嘅日子,要佢瞓棺材冚蓋,我都係搵咗個婆婆,都係加半工,可能多50至100蚊左右。其實都好難搵,冇咩人肯喺呢啲日子做,萬一真係搵唔到人,我哋呢啲做帶隊嘅就要局住上。」

另一位帶隊就話新正頭搵臨時演員瞓棺材唔係易,萬一搵唔到人就要自己頂硬上。(電視畫面)

講返嗰位做死屍嘅伯伯,以為佢係老婆而爭佢嘅陳家樂就大讚佢好專業:「雖然爭嗰幾下係用假人,但係撻落地嗰一下係真嘅,嗰一下佢要撐直個人,要對我哋好有信心咁一嘢瞓落去,有咩意外嘅話,幾十歲人撻一撻都幾大鑊,好在祥哥都好專業,知道點樣可以就住個伯伯。」

陳家樂就話扮屍嗰個伯伯好專業,對佢哋好有信心先做到嗰下撻落地嘅動作。(電視畫面)

尋晚陳家樂同黎耀祥爭屍嘅精彩場面:

+17
+16
+15


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。