蔡依林靠衣著穿出完美身型比例 網友驚嘆：小矮人影出兩米腿
撰文：洪曉璇
出版：更新：
年齡係女人嘅秘密，身高就應該係藝人嘅秘密啦，除非天生一副Model身型，180cm行出嚟當然可以直接講啦，如果唔係報多幾cm高度，真係相當正常嘅一件事。Jolin蔡依林官方報稱高度係158cm，見過真人就知應該減返三兩厘米比較合理。雖然身型嬌滴滴，但Jolin嘅天后氣勢十足，企埋人牆般嘅超模或Dancers訪邊都絕不輸蝕，最新一張街拍照中，令網友驚嘆「小矮人都可以影出兩米腿」﹗
蔡依林呢張相，雙腿比例也太長了吧。（蔡依林IG）
Jolin呢日著嘅高腰闊腳牛仔褲，應該係天后近期至愛，事關單睇IG一個月內佢已經著咗三次。天后身型雖然細粒但身型比例相當唔錯，Jolin亦好識突顯自己長處更顯高佻，其中最重要嘅一個要訣，就係突顯腰部線條。高腰褲裙簡單直接地將腰線拉高，闊腳褲可以遮住鞋面，著埋高跟鞋，真係拉高15cm都神不知鬼不覺。
睇嚟蔡依林真係好鍾意呢條褲，一個月PO三次著住周圍去，記得配貼身上衣比例更長。（蔡依林IG）
但大家緊記，闊腳褲記得配貼身上衣，或者好似Jolin咁配以露腰衫，整體效果更乾淨俐落。如果著裙的話，長裙等於變矮冬瓜呢個迷思已經Out啦，學下Jolin耍小心機，就係開高衩﹗仲要有咁高開咁高，走動時讓美腿展露無遺，加上露腰或顯腰線上身衣著，影出嚟「胸部以下都是腿」絕對不是夢呀﹗
著長裙唔想變矮冬瓜，最緊要開高衩﹗(蔡依林IG)
唔開高衩的話，好似Jolin咁玩透視，若隱若現一樣得。（蔡依林IG）
+6