鄧月平為金像獎戰衣減肥唔怕上圍縮水：命裡有時終須有
撰文：陳栢宇
出版：更新：
唔好以為鄧月平（Larine）得身材好同開始識做戲呢兩樣嘢咁簡單，其實佢都係一個歌手嚟，之前佢亦都推出過跳住唱嘅抒情歌《女神經》，而佢今日就喺鑽石山出席新歌發佈會，仲即場演唱自己嘅最新歌曲《最佳演員》，整體表現都穩定嘅，只係音響問題搞到好似聽到兩把Larine嘅聲咁。
Larine歌喉都唔錯！（陳栢宇攝）
講到歌詞有「人前我仍是燦爛的笑面，人後我靜悄哭泣到未眠」呢兩句，聽落好似好Sad咁，Larine就話唔係得字面上嘅解讀：「其實首歌係講每個人都係主角，唔係配角、臨時演員，而演戲都係源自生命，即係我喺屋企我係飾演媽咪個女，出嚟做嘢我就係演員、歌手咁，兩個角色都要做好咁解。」又話自己想透過呢首歌帶畀大家正能量。
Larine就話自己首新歌係想為聽眾帶嚟正能量。（陳栢宇攝）
有份喺金像獎競逐「最佳新演員」嘅Larine又話因為想件頒獎典禮當晚嘅戰衣著得好睇，所以減緊肥：「最近同班新演員做咗朋友，其中梁雍婷就話想瘦啲，所以拉埋我去減肥。」咁會唔會擔心減走咗自己Signature嘅上圍？佢就笑住答：「命裡有時終須有，命裡無時莫強求。就算係都係好事，等大家唔好淨係留意咗我嗰個位。」
至於會唔會擔心減肥減到上圍縮水，佢就話呢啲嘢係「命裡有時終須有」。（陳栢宇攝）
見Larine今日都密密實實咁，其實係唔係想封胸？佢就話睇劇本有冇需要啦：「如果個劇本係有Feel嘅，角色適合我做就冇問題，其實依家都好少戲要求我性感。」提到佢喺ViuTV劇集《VR驅魔人》都有騷身材，佢就咁講嘅：「我係唔小心！我已經勁抆件打底衫，但埋位時可以太投入，掛住跑跑跑、鬧鬧鬧之後跌低，睇返片先知個領口咁低！」
Larine話依家少咗人搵佢拍性感戲。（陳栢宇攝）
+3