【逆緣】夏文汐未夠廿歲已係豪放女神　代表作《唐朝豪放女》堅爆

無綫劇集《逆緣》又點止得「香港隊長」陳家樂冰封七十年後「重生」搵親人呢個賣點，其實未試過拍TVB劇嘅夏文汐同黎諾懿嘅忘年戀亦都係好引人入勝。大家可能都覺得成件事好衝擊，佢兩個年紀爭足足廿年喎，但其實呢啲咁嘅嘢對57歲嘅汐姐姐好小兒科。可能我呢啲90後對佢拍過嘅作品唔係好認識，我唯有問一問老竇睇下會唔會有多啲料，佢就話汐姐姐當年真係好犀利，直頭係女神級，首部作品《烈火青春》就已經同張國榮、葉童合作，佢同湯鎮業喺電車上面嘅火辣辣嘅激情場面可以話係永世難忘，但點都唔夠佢嗰套《唐朝豪放女》勁。

好快我就搵咗呢套1984上映嘅《唐朝豪放女》嚟睇，而個故事大約係咁：汐姐姐喺戲裡面就飾演唐朝才女魚玄機，佢不甘受婚姻禮教所束縛，所以出家做道姑，但見到道觀內嘅女冠都係鍾意錦衣華服嘅俗人，所以就睇唔過眼騎住白馬走咗去。機緣巧合下，佢喺船上認識咗佢一一生最愛嘅男人「崔博侯」萬梓良，仲好快就同對方翻雲覆雨。不過，身為浪客嘅萬梓良之後就離開咗汐姐姐繼續浪跡天涯，而為咗證明自己可以好似男人咁灑脫，汐姐姐就成為咗揀客嘅名妓。最後，因為汐姐姐殺死咗自己嘅侍婢，而被官府判處斬首之刑。

當初，我真係當係普通情慾片咁睇，點知愈睇就愈唔對路，因為呢套戲可以話係Master Piece，劇情緊密勁有氣氛，而成套戲係應該咁睇：用歷史人物魚玄機嘅豪放半生去包裝嘅女權主義教典。套戲開始咗冇耐，汐姐姐就同佢嘅文人朋友講點解佢會出家：「我入道門，只不過係想做一個獨立自足嘅女人。」而之後佢所經歷嘅嘢都係尋求獨立嘅實踐，包括佢同萬梓良嘅一夜情、佢同侍婢「綠翹」嘅同性交合，以及喺刑場裡面拒絕萬梓良單槍匹馬嘅營救從容就義，就算生死都要自己揀嘅情節。

有兩幕我係比較深刻嘅，首先係汐姐姐同侍婢遭到一班強盜暴力對待，而呢班禽獸不如嘅人就逼佢哋兩個交歡，好彩萬梓良及時嚟到救咗佢哋，到萬梓良想同汐姐姐「相好」嘅時候，汐姐姐一句說話就拒絕咗：「我今日唔想要男人。」所以汐姐姐喺戲裡面嘅豪放並唔係講緊亂搞男女關係嗰種性開放，而係身為女人都可以有選擇、想做乜就做乜，唔係男人話點就點嘅嗰種前衛思想。

第二幕深刻就係佢一劍捅死婢女嘅場面。婢女曾經喺同汐姐姐交歡時講過「我想返屋企」，當刻汐姐姐可能仲未係好明佢想講咩，所以婢女就補多句：「我想返鄉下，鄉下嘅屋企。」汐姐姐好快就意識到呢個女人只係一個普通女人，尋常得令佢覺得可憐，絕對唔係同佢站喺同一陣線。曾經逼婢女墮胎嘅汐姐姐，就認定對方想結婚產子嘅諗法係一種背叛，所以就喺一個夜晚裡面一劍殺死對方，喺對方死後，汐姐姐就激吻對方嘅屍體，成件事好操縱女婢操縱到上癮嘅感覺。

明明汐姐姐喺戲裡面收場唔好，但點解話呢套戲係女權教典？因為導演方令正好成功將汐姐姐嘅操縱狂、任性放大，去話畀大家聽女性爭取自由自決係正確嘅事，因為呢個世界真係好多隨波逐流嘅女人，甘願做社會又或者係男性嘅奴隸，但問題係唔可以太過激進，用自己把尺去度人哋未必係一件道德嘅事，做得過咗火位就只會最後引火自焚，所以咩都係要啱啱好咁。