同「印度劉華」齊名兼撞死過人 巨星薩爾曼汗因偷獵羚羊判5年監

撰文:
最後更新日期:

講起印度男神,我哋香港人第一時間一定係諗起有「印度劉華」之稱嘅阿米爾汗(Aamir Khan),但其實仲有兩個天皇巨星同佢旗鼓相當,分別係薩爾曼汗(Salman Khan)同沙魯克汗(Shahrukh Khan),佢哋加埋仲叫做「3K」(3 Khan)添,喺Bollywood可以話係舉足輕重。不過,比起其餘兩位男神,薩爾曼汗就具爭議性好多,近年都牽涉好多單官司,最近仲因為20年前拍戲時偷獵兩隻受保護嘅印度黑羚而被判入獄5年兼罰款約1200港元,上庭後即時還押。

薩爾曼汗最近因廿年前偷獵受保護動物而被判監禁5年。(視覺中國)

其實今次已經係1998年非法獵羚案嘅第4次指控,喺2006年嘅時候薩爾曼汗已經先後被判入獄1年同5年,但去到下一年又改判緩刑,而2016年更撤銷兩個指控。所以好多印度網民都估計薩爾曼汗再次上訴後,可以再次甩難。

其實呢單案件已經為薩爾曼汗帶嚟4次指控,但之前3次指控都因為各種原因而令佢最後冇事。(視覺中國)

薩爾曼汗惹嘅官非亦唔止呢單,2002年時佢就喺孟買醉駕撞死一個流浪漢兼撞傷四人。肇事後不顧而去嘅佢,喺2015年時卻因為法庭認為一個已死警察畀嘅證供唔可靠,所以就判佢無罪。N次打破印度票房紀錄嘅薩爾曼汗,不但獲獎無數,亦係全球最高收入演員第9位,身家估計高達16億港元。

薩爾曼汗曾經被控醉駕撞死流浪漢,但最後被判無罪。(視覺中國)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。