【VR驅魔人】陳國邦做虎爸逼仔仔跳樓？　高科技招魂問死亡真相

ViuTV劇集《VR驅魔人》繼黑社會大佬吳浩康再會小情人林耀聲、主角王貽興同劉翁大戰鬼王樓南光後，再有精彩劇情畀觀眾睇。喺下星期嘅劇情裡面，分別飾演Jack哥同Jack嫂嘅陳國邦、羅敏莊，因劉皓嵐飾演嘅八歲仔仔Jackson跳樓而大受打擊，夫妻關係亦變得疏離。做喃嘸師傅嘅陳國邦一直都走唔出陰霾，每次打齋個心都隱隱作痛。一向對劉皓嵐寵愛有加的佢，就唔相信仔仔會咁狠心掉低屋企人，認為當中一定別有內情，學校同其他同學肯定要負上責任。所以陳國邦就搵咗王貽興同劉翁呢兩位VR驅魔人幫手，等佢見見個仔問個究竟。而羅敏莊亦喺一場靈堂戲裡面，用水撥向老公陳國邦，同現實恩愛嘅表現爭好遠。

已經十多年沒有同場拍戲嘅陳國邦同羅敏莊，破格夫妻檔上陣演出。羅敏莊就話二人因拍戲結緣，多年後再度螢幕合作：「今次角色係做父母，同現實好相似，同十幾年前合作嘅感覺好唔同！（叫老公同你排戲？）我有叫佢同我排戲架，唔知佢係避我定咩，成日都話要睇晒劇本先，點知到埋位拍都未排過！我唯有自己顧自己啦，現場交流都好緊要，唯有即場發揮！」。

羅敏莊大讚老公陳國邦有演員道德，唔怕NG而被對方怪責：「咁如果我自己唔讀好劇本就NG梗係唔得，佢亦唔會對手做錯而發脾氣！其實我依家個老闆係囡囡，所有時間都比晒佢。導演王貽興又話三日內拍晒我嘅戲份，我安排囡囡比家人照顧，咁咪偷走出黎試吓囉！」

陳國邦就話同老婆同場拍劇無壓力，仲講笑話無拒絕對方排戲的要求：「其實有咩壓力，仲幾方便安排！齊齊去同一地方開工，慳番唔少油錢就真。（叫埋囡囡一齊拍戲？）依家佢要做戲就有難度，要佢學識技巧先得，如果唔係真係喺現場玩多過做！」