郭富城為破自己紀錄搞百場巡迴演唱 竟然連最愛都可以放棄？
撰文：陳栢宇
出版：更新：
天王郭富城、鄺美雲同江美儀等今日喺荃灣出席「單手掌上壓挑戰閉幕禮」，見證300位紀律部隊成員刷新一分鐘最多人同時做單手掌上壓嘅健力士世界紀錄，藉此呼籲市民幫助被遺棄動物。《寒戰》中做警隊一哥嘅城城，就同警務處行動處處長鄧炳強同台，城城就笑指自己戴黑框眼鏡係模仿鄧處長。到佢哋兩個上台頒獎時，佢兩個都非常搞笑，其中城城就話自己如果唔做演員或者歌手時，已經當咗差，而鄧處長就咁講：「我唔當差都可能做咗演員。」
城城同鄧處長都好搞笑。（黃國立攝）
城城受訪時就話自己真係有諗過當差，仲笑指自己拍《寒戰》入戲太深：「今日見到真正嘅處長係緣分，企喺佢隔籬好似同佢係同事咁，當時拍《寒戰》做最年輕嘅警務處處長都好享受，做到咁高職位好受人景仰，保護市民有份英雄感同責任感。」至於會唔會畀囡囡Chantelle做女警？城城就咁答：「到時先話你聽，太遙遠嘅事。」
會唔會畀囡囡當差？城城就話呢件事太遙遠。（黃國立攝）
提到城城準備嚟緊嘅100場巡迴演唱會，佢就話保持體能好重要：「今次係自己體能上嘅極限挑戰，今次100場，要3年嘅時間去保持狀態，係辛苦啲，但係我願意接受挑戰。」會唔會有機會破張學友147場嘅紀錄？城城就答：「紀錄係自己破自己，做到100場自己都好滿意。」
城城正準備嚟緊嘅100場巡迴演唱會。（黃國立攝）
為咗破自己紀錄，城城犧牲都好大，佢就話自己為咗咁而放棄自己最愛嘅麻辣火鍋，仲要戒足三年咁話：「要成果就要付出同犧牲，願意放棄麻辣火鍋，又會戒糖、鹽、油，同埋每日只可以飲一杯咖啡。人生有好多挑戰，當中健康是最重要，所以I am OK。」怕唔怕做巡演時唔捨得老婆同個女？城城話：「我又唔係去3年唔返，唔怕嘅，到時佢已經3歲，應該已經識唱我嘅歌，係開心嘅一件事，我要做一個好榜樣，要努力認真工作，不斷突破自己。」
城城為咗巡演竟然戒食自己最愛嘅麻辣火鍋。（黃國立攝）
+21