【有片】陳柏宇符曉薇拍片公佈腹中塊肉性別：有冇慈菇椗？
撰文：洪曉璇
出版：更新：
中國人傳統思想，硬係覺得結咗婚就要生BB，生個慈姑椗即係囝囝就更加圓滿，可以傳宗接代呀嗎﹗陳柏宇去年同老婆符曉薇拉埋天窗，婚後火速造人成功，兩日前上載超聲波照公佈喜訊，至於BB性別到底係男定係女？陳生陳太就相當有心思，呢日叫齊一家大細拍片公布，大家買定離手啦。
陳生陳太訂咗個靚蛋糕公布BB性別，仲講笑話唔好將蛋糕上嘅鞋仔裝飾切爛，話將來可以俾BB着番。（影片截圖）
4月7號Jason喺IG上載超聲波照，宣佈造人成功，呢日就上載短片公佈BB性別啦。見到片段中佢地約埋一家大細齊齊見証，陳生陳太買咗個靚蛋糕，好似西方傳統咁，切開蛋糕如果係粉藍色代表生仔，粉紅色就代表生女。Jason話：「究竟男定女呢？有『慈菇椗』定冇『慈菇椗』？我哋嘅終極揭盅方法，係切蛋糕，用顏色代表性別。」一路拆包裝時Jason一路講唔停，話自己覺得係囝囝，但陳太就話自己其實想生女。開估啦，一切開係粉紅色架，Leanne即刻開心到尖叫，然後大家仲一齊嗌「IT'S A GIRL」！唔知Jason會唔會係怪獸爸爸呢？
陳太如願以償生囡囡，開心到即時尖叫呀。（影片截圖）
呢一幕齊齊嗌口號，感覺有點似賀歲片ending……（影片截圖）