【反黑】張建聲見到烏鴉真身張耀揚勁激動：佢真係好經典
撰文：鄺鈺瑩
出版：更新：
張建聲上載與張耀揚的合照後，唔少網民都留言表示超級期待兩大癲人交手。（fb圖片)
隨著《反黑》第二季開拍在即，唔少網民都跪求加入《古惑仔》系列的經典人物，如烏鴉（張耀揚）、大飛哥（黃秋生）等，而就係呢個時候，《反黑》核心人物－－招積（張建聲）於Facebook上載了同張耀揚的合照，並寫上：假如「招積」遇上「烏鴉」你們想看吧，並加上了反黑的hashtag！
莫非呢個宇宙最奸的組合真係有望出現在《反黑》第二季？張建聲接受訪問時就唔多肯透露詳情，只係話:「前日在宋本中導演studio見到佢，影張相擺吓啫，佢真係一個好經典的人物。雖然我係招積，但佢係烏鴉，自己都怯，不過其實佢真係好nice。」問到有否向張耀揚請教如何做得更喪，張建聲就話為免影響角色的發揮，所以從來都唔會問人。「不過能夠見到烏鴉真係好激動。」
張耀揚雖然因烏鴉一角而彈起，但他08年因拍動作戲導致腰部脊椎留下嚴重後遺症，從此消失在演藝圈，並轉行做生意。（網上圖片）
咁到底張耀揚會否現身《反黑》呢？身為核心人物的宋本中就話《反黑》除了劇集之外，亦會開拍電影版，內容除了是張建聲的招積外傳，亦會有陳小春的「鳳凰外傳」以及陳國坤的「張鈞外傳」。「呢三個外傳會以電影版呈現，外國公司投資，並且用他們的crew拍攝，而張耀揚將會以幕後製作人員的身份參與。」宋本中口中所指的外國公司是否非常撐《反黑》的Netflix呢?他就表示由於未簽約的關係，所以暫時不便透露，但可以肯定的是張耀揚確實會參與其中，至於會唔唔會有機會現身幕前呢？相信就要到時先知啦。