【金像獎】歐愷淳冇機贏新人獎? 鄧月平:6句對白好難睇到演技

撰文:
最後更新日期:

今屆金像獎嘅「最佳新演員」除咗憑《黃金花》入圍嘅凌文龍同《藍天白雲》嘅梁雍婷兩大熱門外,其實其餘三位入圍者都不容忽視,包括《小男人週記3之吾家有喜》鄧月平、《春嬌救志明》歐鎧淳同《殺破狼‧貪狼》陳漢娜,其中鄧月平自覺冇機贏獎,而佢亦都對歐鎧淳憑6句對白入圍有所睇法。

場地提供:M2 Home

「第37屆香港電影金像獎頒獎典禮」聽晚就正式舉行,當然焦點都係落喺「最佳電影」、「最佳導演」同影帝、影后身上,不過對好多初踏影圈嘅新人嚟講,以上嘅獎項都真係遙不可及,離佢哋最近嘅都應係「最佳新演員」呢個獎。今年,憑《小男人週記3之吾家有喜》入圍嘅鄧月平(Larine),就同歐鎧淳、陳漢娜、凌文龍同埋梁雍婷爭新人獎。

鄧月平憑《小男人週記3之吾家有喜》角色爭「最佳新演員」。(劇照)

Larine接受《香港01》訪問時就覺得自己冇咩機會拎獎,亦話自知唔係大熱,所以非常輕鬆:「我支持凌文龍同梁雍婷,呢個獎都係佢兩個爭架喇!」講到歐鎧淳憑6句對白就入圍,Larine就有自己睇法:「佢係一個好好嘅女仔,6句對白係好難睇到佢演技,我相信佢拍戲份比較多嘅戲,一定會睇到佢嘅實力。」所以歐愷淳冇咩機會?佢就咁答:「我覺得我自己冇機會啲。」

鄧月平相信歐鎧淳接拍戲份較多嘅電影會發揮到實力。

其實《小男人週記3之吾家有喜》都已經係一年前嘅作品,翻轉頭睇返自己嗰時嘅演技,Larine就咁覺得嘅:「嗰時識嘅嘢冇依家咁多,但係都係傾盡100%嘅力量做出嚟,咁依家當然仲有好多嘢改善。」佢亦都好感恩入行冇耐就可以接觸到鄭丹瑞、羅家英等前輩,所以會繼續努力賺取觀眾認同。講到佢入行已經一段時間,Larine就話開始習慣:「電影本身係好迷人,但娛樂圈就商業味重啲,有試過有唔開心嘢,但依家已經唔記得哂喇!同埋入咗行後係開心嘢比較多,最起碼識咗好多朋友,我發現大部分演員喺鏡頭後比鏡頭前更加吸引。」

鄧月平話入行後遇到嘅開心事多過不快事,更覺得演員們喺鏡頭後更加吸引。

+12
+11
+10


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。