【奔跑吧6】香港代表李恩童出席聯合國演講　熊貓發電機其實係乜

大陸綜藝節目《奔跑吧兄弟》星期六（14/4）啱啱播完第一集，大家都好Focus喺Angelababy講英文度，但網民通常摩擦力好強，今集佢哋去咗維也納聯合國中心用英文演講，其中有個女仔叫李恩童就話自己係代表「中國香港」提出一個Idea，佢就話應該將熊貓同太陽能發電站結合，即係將發電站砌個熊貓樣出嚟，因為咁樣會靚啲，就會提升青年人對新能源嘅興趣。不論呢個諗法你Buy唔buy，反正佢就揚威國際參加咗多個國際論壇，好似聯合國經濟與社會理事會青年論壇咁，真係威過龍咁威！

不過網民對佢嘅創意興趣不大，反而好留意佢喺微博度Po咗好多張同明星嘅合照，好似係陳偉霆、王源、鹿晗、鄧超、陳赫咁，真係葡萄死人。根據網民嘅起底，李恩童英文名叫Ada Li，係香港出世，鄉下係浙江杭州，講得一口流利嘅英語同普通話，令大家對佢嘅背景好有興趣。李恩童曾經喺深圳讀小學，又去過美國俄勒岡州讀高中，佢提過爸爸喺能源公司工作，所以自小就對環境氣候特別有興趣。