【教育電視】人氣女歌手廿年前拍過ETV　接近九成人估唔到她是誰

真心唔知依家讀緊小學嘅學生，上堂仲會唔會睇教育電視，但係當年讀緊小學嘅時候真係好期待呢樣嘢，最起碼成件事係開心過聽老師講書，同埋成個課室黑媽媽偷偷哋瞓咗都冇人知。最近，香港電台就籌備緊一個節目，叫《我們都是看ETV長大的》，等大家可以重溫童年回憶，又等大個仔嘅觀眾了解依家嘅教育電視，而佢哋仲喺網上搞咗個有獎遊戲，貼咗條片等大家睇完之後票選「ETV一哥一姐」。

【教育電視】王祖藍18年前演排球隊隊長多女迷：點估到自己做小生

「ETV一哥一姐」個候選名單就有六位仍然喺娛樂圈好活躍嘅歌手同藝人，有啲真係斷估都估唔到佢曾經拍過教育電視，好似依家喺內地紅透半邊面嘅G.E.M.（鄧紫琪）同王祖藍咁。除咗佢兩個，片中都仲有四位演藝人喺度，包括：林一峰、黃美棋、楊思琦同埋……咦，呢個邊個嚟？如果冇睇字幕、冇聽旁白，我諗我真係一世都估唔到到底呢個係邊個，而呢位ETV童星就係唱過《只要和你在一起》、《到此為止》等歌曲嘅連詩雅（Shiga）。

其實就算開咗估我都真唔多相信，雖然細細個嘅Shiga同依家一樣都係面尖尖高高瘦瘦，但真係得少少似依家個樣，真係可以話女大十八變。而Shiga細個時就主要拍英文科嘅教育電視嘅，片中就播咗佢廿年前同佢個外藉同學仔講：「Did you sleep well last night, Nancy?」發音仲幾準添，所以我諗佢嘅英文真係由細叻到大，之前喺網上串錯「Rest in Peace」做「Rest in Piece」九成九都係唔小心。