【年年18歲】湯怡摷返當年中學校服 學生妹造型街訪無違和
撰文：洪曉璇
出版：更新：
湯怡入行12年都仲係咁清純。（湯怡Facebook）
+4
最近陳家樂跳入電視圈，喺劇集《逆緣》中嘅表現令人眼前一亮，大家先驚覺原來佢已經入行十年。其實同公司嘅湯怡就更加誇張，2006年參加《美女廚房》中美少女廚神選舉，被冠以「少女黎姿」稱號，話咁快已經過咗12年，估唔到最近湯怡搵返套中學校服出嚟拍攝做街訪，條裙勁啱身仲要毫無違和感，點睇都唔似30歲﹗
湯怡最近化身主持做街訪，內容係咩唔重要，大家都俾佢嘅學生妹造型吸引住。（湯怡Facebook）
「學生不應談戀愛」呢個老生常談嘅話題，聽就聽得多，遵唔遵守就係另一回事啦。最近湯怡走上街頭搵市民做街訪，問下大家讀書時有無追求者/追求人，街坊嘅答案都係大同小異，最吸晴嘅都係湯怡本人，事關佢搵返當年套中學校服出嚟，完全啱身唔使改，氣質好PURE好鄰家呀﹗連做緊訪問時受訪者都不禁望住佢大讚好靚女，湯怡不禁留言話：「我中學嘅時候黑過嚿炭……」睇埋佢張學生相，真係不禁講句果然愈大愈靚女。
湯怡喺電影《某日某月》中首次擔任電影第一女主角，繼續都係做學生妹。（湯怡Facebook）
不過當年真係讀緊中學時嘅湯怡，中二學生相係咁嘅樣……（湯怡Facebook）
入行以嚟湯怡一直走鄰家女孩路線，儲落好多粉絲，係眾人心中嘅女神。由於佢經常孖住同公司嘅陳家樂拍攝，早幾日湯怡上載同陳家樂嘅合照留言話：「有人問我地係咪拍緊拖？似咩？似咩？咁好笑嫁咩？識左咁多年先黎搞啲咁嘅野？不過咁影又幾似嘅哈哈﹗」雖然張自拍係幾似，但大家唔好忘記正印男友係洪卓立先啱呀﹗佢地拍咗足足11年拖啦，不時分享拍拖點滴，仲建立咗個專屬Hashtag 「#大洪小怡」，唔怕俾佢地曬親嘅就去相啦。
不時孖住陳家樂拍攝，俾人誤會拍緊拖。（湯怡Facebook）
正印男友係洪卓立呀﹗大家唔好認錯呀，佢地拍左拖足足11年啦。（洪卓立Facebook）