【逆緣.專訪】陳家樂極窮被迫過隱青生活:冇錢到飯都唔敢食!

撰文:
最後更新日期:

陳家樂喺無綫熱播劇集《逆緣》裡面飾演103歲冷凍人「鍾定國」,二次大戰時便被日軍雪喺實驗室,醒來之後至慢慢意識到自己身在2018年,並尋回兒子姜大衛同孫兒黎耀祥,其演技亦大獲好評。而事實上,陳家樂亦度過了一段頗長的自我放棄嘅「冷凍時期」,有6、7年都係浮浮沉沉咁,當中更有3年係完全冇嘢撈:「我一開始嘅時候都係打工仔,做保險、做打電話嘅Sales,唔知係咪因為喺出面被搓圓撳扁得多,搞到個人冇乜火冇乜脾氣。當時我係儲咗筆錢先參加《英皇新秀歌唱大賽》入行,開始時覺得筆錢都夠使,但冇諗過咁多年都搵唔到錢,搣咗四年就冇哂啲錢,嗰陣時真係想死,嗰時24、25歲。」

【逆緣】鄭俊弘因何雁詩失鍾定國一角? 監製王心慰:時機問題

【逆緣】監製王心慰拍佛學劇 唔怕觀眾睇唔明:突出人性缺點啫

陳家樂直言用盡積蓄時,有想死嘅感覺。(陳順禎攝)

或者呢個已經唔係生活問題,而係生存嘅問題,所以陳家樂要周圍問身邊朋友借錢度日:「嗰時公司叫做墊支咁每個月畀500蚊我,如果我完全冇嘢做就係得呢500蚊,而呢500蚊真係好快就冇咗,所以成日叫朋友借少少畀我,到後尾啲朋友都覺得唔可以咁樣借錢畀我,係屋企人見到我咁樣,靜靜雞攝幾百蚊落我銀包度,我先過到最艱辛嘅日子。」

陳家樂透露公司都有每個月墊支500蚊畀佢,但其實唔夠生活。(陳順禎攝)

除咗開源,就係節流,陳家樂為咗減省支出,佢只能夠揀唔出街:「個人愈來愈摺,自己都唔知自己想點,一出街啲人又覺得我係明星、藝人,好似好風光咁,但其實我連妝頭買衫錢都冇,連飯都唔敢食,淨係敢食兩蚊個嘅包,我最難堪係啲人以為我好風光,所以我好多謝麥曦茵導演帶返我出嚟。」

雖然佢依家係笑住咁講,但其實佢當時真係好迷茫好摺好唔知自己想點。(陳順禎攝)

除咗多謝有人肯再用他自己,陳家樂亦好多謝最近兩年認識嘅一班戰友:「以前真係覺得好孤獨,入行頭6、7年,香港電影真係幾淡市,好少人製作,我連Casting嘅機會都好少,好在呢幾年本土製作回歸。我哋呢班新血其實係有個共識,就係好想團結呢代電影人去一齊做事,好似我哋成班男仔上年幫方皓玟拍咗個MV,而呢個係一個開始嚟,之後我哋都係搞足球隊、一齊諗劇本,以前係冇呢樣嘢。今屆金像獎好多新演員上台做頒獎嘉賓,我自己都好開心。」

陳家樂好慶幸可以認識到麥子樂、林耀聲、岑珈其等一班共同戰友。(陳順禎攝)

依家事業上揚緊,係咪解決到依家年青人面對緊嘅問題?陳家樂就話買樓上車對佢嚟講仲未係易事:「以前真係覺得冇乜可能,樓價實在太高,我計過一日只用300蚊先可以有希望,但我日日都要出街開工,同同事做嘢都要請佢哋食飯架,冇辦法唔應酬。有前輩就同我講,呢啲錢係要用,要當係投資,如果就咁擺喺度,你收入未必升到,而我咁做收入真係有提高到。」咁到底戲中同佢有感情線嘅林夏薇有冇面對過陳家樂嘅困難?下編再續。

聽日會繼續講林夏薇嘅背後坎坷。(陳順禎攝)

+10
+9
+8


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。