【逆緣.專訪】林夏薇為學戲放棄拍《色,戒》:我冇後悔呢個決定

撰文:
最後更新日期:

無綫劇《逆緣》裡面「香港隊長」陳家樂嘅戇直演出當然係一個亮點,但其實林夏薇扮日本妹都扮得幾好睇,而為咗演得似模似樣,本身唔識日文嘅佢仲兩星期內日練12個鐘,真係下咗唔少苦功。其實薇薇為咗演藝真係搏到盡,練學日文嚟講只係其中嘅一小部分,佢經歷過嘅辛酸絕對係好多人都唔想體驗。

【逆緣.專訪】陳家樂極窮被迫過隱青生活:冇錢到飯都唔敢食!

林夏薇為《逆緣》角色苦練日文,而佢為演藝理想亦都投放咗好多心血。(陳順禎攝)

相信好多人都覺得薇薇家境好,出身中央戲劇學院(中戲),係章子怡、劉燁、鄧超等巨星嘅師妹,又有林峯呢個堂大佬睇住,自然就可以平步青雲,事實上佢係一步一步咁用自己嘅汗水同淚水去到今時今日嘅位置,唔應該單憑出身就抹煞佢嘅努力。薇薇喺訪問中就話自己16歲隻身到北京讀書時「真係乜都唔係」:「我由細到大,屋企都係教我要靠自己,我自己一個喺北京時,我係住地下室,要靠做臨時演員搵錢,試過得30蚊人工都要畀中介呃,又試過拍幾日廣告得100蚊。」

林夏薇指自己讀中央戲劇學院時係住地下室,仲試過連30蚊嘅臨演費都俾中介呃。(陳順禎攝)

係咪讀完中戲就一帆風順?薇薇好記得學校老師同佢講過,各位同學畢業後都係由零再開始:「其實中戲只係一個平台,令你接觸多咗啲相對安全嘅機會,因為有好多大導演會去中央戲劇學院搵演員。」咁讀書時有冇人搵過佢拍戲?佢就講咗件好少人知嘅事出嚟:「我讀大學時其實係有機會參與李安嘅《色,戒》,如果我拍,《色,戒》就係我第一套作品。不過,老師話我係一年級升二年級,唔可以出去拍戲,個角色係貫穿成套戲,同學校傾咗好耐都唔畀。老師就話如果要拍嘅就要退學,我有同學就覺得我應該退學,機會唔係次次有,但係我選擇咗腳踏實地,因為我冇信心第二年再考到入中戲。我覺得中戲係好神聖,我嘅初心係入嚟求學問,讀完之後再搵其他成就。我掙扎咗好耐,諗到底係我係為一個角色定係其他,最後我係揀咗繼續讀書。」而佢亦都冇後悔過呢個決定。

林夏薇讀書時放棄了演出李安《色,戒》嘅機會,冇為一個有機會爆紅嘅角色而放棄學業。(陳順禎攝)

而該角色最後由台灣演員朱芷瑩(左)演出。(網上圖片)

之後,薇薇就更清楚自己嘅目標,就係裝備好自己,做一個真心鍾意做戲嘅演員,而呢個諗法到今時今日都冇變過:「我同我同班同學陳曉仲有經常聯絡,佢覺得我返香港發展係啱,而佢喺北京都好拚博,遇到嘅困難都唔同,但都係向住同一個目標繼續進步。我拍緊《公公出宮》時,佢打畀我,問我想未來工作係點樣,問我想唔想有突破,仲建議話不如一齊放低所有嘢去跑龍套,我話都可以試下,點知我哋各自都好快結咗婚,變得有啲嘢冇辦法放低,但我哋都冇放棄過追求自己嘅夢想。」而佢亦都好記得學校老師呢句說話:「佢話做人做得好,你先會學識做戲。」

髮型提供:Ivan Lee @ Headquarters(林夏薇)

化妝提供:江中平化妝室(林夏薇)

服飾提供:GU Hong Kong(陳家樂)

林夏薇從來冇放棄過自己夢想,仲好記得老師同佢講過嘅「先學做人後學做戲」。(陳順禎攝)

+14
+13
+12


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。