【專訪】前有線主播曾美華育兒有自己一套:其實我係Lazy Mum

撰文:陳栢宇
出版:更新:

前有線電視主播曾美華(Carman)雖然已經離開咗新聞直播室,但間中都會返娘家開工,繼兩年前同仔仔女女出埠拍《帶阿B去旅行》,最近佢便為奇妙電視節目《小店大廚 - 台灣篇》介紹當地美食。Carman笑指自己主要是飲飲食食同《小店大廚 - 台灣篇》打卡影靚相:「最正係食虱目魚肚、魚丸,好抵,港幣8.5咋!」同小朋友去旅行開心啲定係自己一個?佢就咁睇嘅:「帶埋仔女去旅行就難打卡影靚相,但係有埋佢哋會開心、溫馨好多。」

曾美華最近為奇妙電視拍《小店大廚 - 台灣篇》,佢就話自己一個人出Trip同帶埋仔仔女女係唔同Feel。

自從2011年Carmen下嫁黎智英次子黎耀恩後,好多人都開始話佢係「幸福少奶奶」又或者「闊太」,但佢就話其實唔多鍾意呢啲稱呼:「就算係『最美麗女主播』呢啲光環,我都係唔鍾意,明明我已經唔係做緊主播,曾美華就係曾美華。」而佢亦都覺得自己係需要工作:「我鍾意玩,做唔到全職媽媽,呢個世界仲有好多嘢可以試,同埋返工可以到小朋友榜樣,等佢哋知返工先至可以有收入。比起High Tea、Shopping,我鍾意去旅行多啲,我希望仔大女大後可以做一次背包客,呢個都係我Bucket List其中一樣嘢。」

自2011年曾美華下嫁黎智英次子黎耀恩後,好多人就稱佢係「闊太」,但其實佢唔鍾意人哋咁叫佢。
2014年,曾美華離任任職十年嘅有線新聞主播崗位。(網上圖片)

相信好多人都會覺得Carmen嫁得好好,老公好錫佢,又有大屋住,又湊夠一仔一女,其實佢自己都咁覺得:「真係感恩,特別係有一對小朋友係好Complete Your Life。」咁會唔會有啲點樣嫁得好嘅貼士?佢就咁答:「其實係百客愛百貨,百貨應百客。有啲人好鍾意我呢種性格,有啲人就覺得我太大癲大肺、唔夠莊重,你永遠唔知咩人鍾意呢種人,呢啲係緣份嚟。其實拍拖又好,結婚又好,都唔係最難嘅一部分,之後經營婚姻先係最難嘅部分,特別係女人生咗BB後,好似『脫胎換骨』咁,成個人脾氣暴燥咗好多,明明冇嘢要嬲老公,但好似睇佢唔順眼咁。」所以佢好開心老公好識得包容、體諒佢。

至於點樣先嫁得好?曾美華就話冇咩秘訣,得兩個字:「緣份」。(梁碧玲攝)

講到Carman大仔依家五歲半,囡囡四歲,佢就話其實佢兩個都好好湊,不過係比較有主見啲咁:「用玩具、食物係氹唔到佢哋,一定要講道理先肯聽你講。」至於有咩湊仔心得,佢就笑指自己其實係個Lazy Mum:「我自己就鍾意『放手』嘅,唔鍾意係咁帶小朋友上興趣班,就算去上堂學法文、韓文、日文,都唔及帶佢去旅行,親口同人講『Kamsahamnida』或者親眼見識巴黎鐵塔。」

而湊仔,就係「放手」兩隻字。(梁碧玲攝)

咁會唔會生第三個?Carman就話唔會喇:「其實係對香港有少少失望,特別係教育制度,好多方面都係扼殺緊小朋友嘅創意。我係填鴨式教育出嚟,我唔希望我嘅小朋友變成填鴨,所以我畀小朋友讀國際學校,但係係最平嗰隻,我唔想佢哋有所謂讀貴族學校嘅光環。或者有人會覺得咁都好離地,但我覺得小朋友係應該要成長得開開心心、冇壓力。」

曾美華話自己係喺填鴨式教育出嚟,所以都唔希望自己小朋友變成填鴨。(梁碧玲攝)
+1