【蝸居】粉紅屋男戶主指高達無事會再執屋：風塵味重無得留低

網購而家幾乎人人都識，小至平時買衫褲鞋襪，大至婚禮佈置婚紗西裝，要自己買材料又有幾難？不過買到返嚟點配搭就唔係人人都識啦。呢個星期TVB節目《蝸居宅急變》，引起極大迴響，其中一集將小蝸居變成「烈焰紅唇粉紅博物館」，令大家同男戶主一樣睇到眼都突埋，網友大鬧女戶主借機掉晒老公d玩具甚至進行起底，男戶主終於忍唔住企出嚟護妻，澄清玩具原封不動喺屋企，同時直斥製作單位靠害：「我想講我老婆係鐘意淡粉紅而唔係桃紅囉﹗佢地根本買錯哂顏色...」

岑應主理嘅節目，Queenie出鏡率實在高，唔知點解由美容達人變咗做家居達人，呢次粉紅部屋又係佢嘅杰作，話就話「Cheap but Stylish」，不過Stylish咗喺咩位呢？似乎無乜人識欣賞。呢次Queenie聽到女戶主鍾意粉紅色，就話要攪間「烈焰紅唇粉紅博物館」，男戶主開門嗰下個樣灰到一個點，連日嚟輿論壓力令男戶主要爆啦，上網留下長文回應。

男戶主澄清老婆無掉佢啲珍藏，鬧爆TVB呢次靠害：「我作為老公都滿足下老婆少少心願係裝修度整得粉紅少少有咩問題？同埋我想講我老婆係鐘意淡粉紅而唔係桃紅囉﹗佢地根本買錯哂顏色..……」一路睇個節目都以為自己眼花，乜呢隻係粉紅色咩？原來真係買錯……男戶主仲好有耐性回覆提問，好似網友問：「師兄有冇覺得間屋好似一樓一？」男戶主話：「講真我都覺得似，如果唔係節目度都唔會咁既表情」仲話自己入屋時反應係真情流露﹗不過千錯萬錯都唔關老婆事，佢仲大讚老婆一直好支持自己儲玩具。

「見大家咁關心我個櫃，我就係度同各位師兄報平安先！我個櫃連入面既玩具以至於雜物房入面既收藏全部原封不動無郁過，本身我無諗住出聲，但實在太多未審先判既師兄們不斷出post或留言中傷我最愛既人，所以我不得不出此post證明我老婆並非你地心目中既人！我想講佢一路好尊重我既興趣，家中既玩具全部都係我老婆送比我氹我開心的，識我既人都知我每次收到呢d禮物都會放上fb放閃絕無虛假，試問一個肯送呢d貴重玩具比另一半既女人點會係你地口中既人？」最後佢話改造完之後其實會再執過：「屋企既佈置方面我會再行處理，我地都覺得ok既會保留，風塵味重既都唔會有得留低。」叫大家唔使擔心啦。