熊黛林親認誕下5磅孖女 全家福勁溫馨：眼仔好大好靚女
撰文：洪曉璇
出版：更新：
3月中Lynn發放靚靚孕照，當時大家都唔知原來巨肚內藏住孖胎。
熊黛林（Lynn）與老公郭可頌嘅愛情結晶品，日前已經出咗世喇。仲要係好事成雙，原來Lynn一直陀緊嘅係一對孖女！新手媽媽Lynn表示第一眼見到兩個囡囡時，又感動又開心：「BB女5磅左右， 眼仔好大好靚女，老公開心到不得了。」
為母則強果然無錯，Lynn一次抱起兩個囡囡都面不改容，仲笑得好幸福添。
Lynn同郭可頌一人抱住一個囡囡，產後Lynn復原得相當唔錯，精神幾好噃。
出名錫老婆的郭可頌，喺Lynn入產房前非常緊張，見到老婆同囡囡平安時終於鬆一口氣。 但由於初生BB太嬌小，令新手郭爸爸不敢亂抱兩位前世情人，最終要靠Lynn出手：「我叫老公坐定定擺住抱B姿勢，然後叫我媽咪抱囡囡放在老公懷抱，老公後來抱到不捨得放手。」
心心內藏住兩位郭家千金嘅小腳，好可愛呀。
郭爸爸有Lynn呢個大情人，又新添兩位小情人，自然幸福滿瀉， Lynn更笑言，見到大隻老公抱住嬌小B女畫面， 反差很大非常搞笑。而剛剛生完BB嘅Lynn精神相當不錯：「媽咪都有飛過來香港陪我待產， 我已慢慢開始學習湊小朋友，同埋餵緊人奶，因為對BB最好架嗎，最緊要佢地健康。」除咗餵人奶Lynn更安排儲起臍帶血，為囡囡做足萬全保障。至於BB現時仍未改名，Lynn話會同老公細心為孖妹挑選最適合嘅名。
就咁睇腳仔，唔知Lynn分唔分到屬於邊個囡囡呢？